Tarmoqda allaqachon mashhur bo‘lib ulgurgan Labubu o‘yinchoqlari o‘zining tishli hayvonchalarni eslatuvchi g‘ayrioddiy ko‘rinishi bilan ajralib turadi. Ularning asosiy xususiyati — blind box ekanligi, ya’ni xaridor qutini ochmaguncha qaysi figuracha chiqishini bilmasligidadir. O‘yinchoq narxlari ham arzon emas: bir dona Labubu taxminan 65 dollar, blind box qutisi esa 120 dollar turadi.
Bunday muvaffaqiyatdan so‘ng, Labubu ishlab chiqaruvchi PopMart kompaniyasi asoschisi Van Nin Xitoyning eng boy odamlaridan biriga va mamlakatdagi eng yosh milliarderga aylandi. U atigi 38 yoshda va uning boyligi 22,7 milliard dollarga yetdi.
Labubu qahramoni ilk bor 2015-yilda “Maxluqlar” nomli grafik romanda paydo bo‘lgan. Ammo bu o‘yinchoqlar taniqli insonlar tomonidan ijtimoiy tarmoqlarda ko‘z-ko‘z qilinganidan keyingina ommalashdi.
Bunday o‘yinchoqlarning oddiy versiyasi 10–30 dollar atrofida turadi, ammo siz noyob Labubuni topib olsangiz, uning narxi bir necha barobarga oshadi. Ko‘plab kolleksionerlar va trendlarga amal qiluvchilar bunday qutilarni ulgurji tarzda xarid qilishadi va kamyob modellar ortidan quvadi. Quyida har qanday Labubu muxlisi orzu qiladigan 5 ta eng noyob va qimmatbaho o‘yinchoqlarni ko‘rib chiqamiz.
1. Best of Luck
Bu o‘ziga xos Labubu 2023-yil 30-dekabrda atigi 3000 dona cheklangan nusxada ishlab chiqarilgan. Uning dastlabki narxi 85 dollar bo‘lgan. Bugungi kunda bu figurchaning narxi olib sotarlar qo‘lida 1500–2000 dollarga yetgan.
2. Big Into Energy — ID
Big Into Energy seriyasidagi “ID” figurchasi eng noyob va sirli o‘yinchoqlardan biri. Oddiy versiyalaridan farqli ravishda, u kulrang bo‘lib, ultrabinafsha nurlarda yaltiraydigan detallar bilan bezatilgan. Blind box’dan bu figurchani topish ehtimoli 1:144. Narxi esa 1200 dollargacha yetadi.
3. Labubu x Vans
PopMart va mashhur Vans poyabzal brendi hamkorligida ishlab chiqarilgan mazkur Labubu ham cheklangan kolleksiya. U atigi 3 275 dona chiqarilgan. Narxi esa 1500–3000 dollar orasida farqlanadi.
4. Have a Seat — DUODUO
DUODUO — Have a Seat seriyasidagi o‘yinchoqlardan biri bo‘lib, uni topish ehtimoli 1:72. O‘tirgan holatdagi bu Labubu o‘ta kamyob va xaridorlar orasida mashhur. Uning narxi 400–1000 dollar oralig‘idadir.
5. Exciting Macarons — Chestnut Cocoa
Exciting Macarons seriyasidagi Labubu figurachasi aynan Chestnut Cocoa rangi bilan noyob hisoblanadi. Uning blind box’dan chiqish ehtimoli 1:72, qo‘l bozorida esa narxi 1200 dollargacha yetadi.
Izoh (0)