Qonunchilik palatasining 24-iyundagi majlisida ijtimoiy himoyani ta’minlash hamda ijtimoiy ish sohasidagi munosabatlarni tartibga solishga qaratilgan “Ijtimoiy ish to‘g‘risida”gi qonun loyihasi birinchi o‘qishda ko‘rib chiqilib, qabul qilindi.
Majlisda ta’kidlanishicha, ijtimoiy ishni tashkil etish va ijtimoiy qo‘llab-quvvatlash borasida aholining ehtiyojmand qatlamlariga ijtimoiy xizmatlar ko‘rsatish tizimi yaratilgan bo‘lsa-da, ijtimoiy ish sohasidagi munosabatlarni qonun darajasida tartibga solish zarurati yuzaga kelmoqda. Shu sababli ijtimoiy himoyani ta’minlash hamda ijtimoiy ish sohasidagi munosabatlarni tartibga solishga qaratilgan yangi va yaxlit qonun qabul qilinishi taklif etilmoqda.
Ushbu qonun loyihasida ijtimoiy ish sohasidagi davlat siyosatining asosiy prinsiplari, ijtimoiy ish tashkil etiladigan sohalar, ijtimoiy ishni tashkil etishda idoralararo hamkorlik, ijtimoiy xodimning maqomi, vazifalari va majburiyatlari hamda maxsus vakolatli davlat organi va uning vakolatlari belgilanmoqda.
Shuningdek, ijtimoiy himoyaga muhtoj oila (shaxs)ni aniqlash va ularni ijtimoiy himoyaga muhtoj oila (shaxs) deb topish asoslari, ijtimoiy xizmat va yordamlardan foydalanuvchilarning huquqlari va majburiyatlari nazarda tutilyapti. Ijtimoiy xizmat va yordamlardan foydalanuvchiga ijtimoiy xizmatlarni ko‘rsatishni tugatish asoslari, ijtimoiy xizmat va yordam turlari hamda ijtimoiy xizmat standartlari ham aks etmoqda.
Ijtimoiy xizmatlar birlamchi, ixtisoslashgan va yuqori ixtisoslashgan turlarga ajratilmoqda. Shu bilan birga ijtimoiy xizmatlar fuqaroning uyida, mahallasida, ijtimoiy obyektlarda hamda onlayn shaklda ko‘rsatilishi belgilanmoqda.
Majlisda mazkur hujjat ijtimoiy ish sohasidagi munosabatlarni tartibga solish, aholining ehtiyojmand qatlamlariga ijtimoiy xizmatlar ko‘rsatish tizimini yaratish hamda ularning ijtimoiy himoyasini kuchaytirishga qaratilgani qayd etildi.
2025-yilning fevralida aholini ijtimoiy himoya qilish tizimini moliyalashtirish tartibini yaxshilashga qaratilgan prezident farmoni qabul qilingandi. Hujjat bilan 2025-yilning 1-aprelidan “Ijtimoiy daftarlar” jamg‘armalari orqali ko‘rsatiladigan ijtimoiy yordamlar Kambag‘al oilalar reyestriga kiritilgan oilalarga berilishi belgilandi.
Izoh (0)