O‘zi 5 nafar farzandning otasi bo‘la turib, ikkinchi xotinining 11 yashar qizini zo‘rlab kelgan erkak qo‘lga olingani haqida xabar berilgan edi. Toshkent shahar sudlarining “Daryo”ga ma’lum qilishicha, holat yuzasidan sud ishi yakunlandi.
Bloger niqobi ostidagi shaxs qonuniy xotini bo‘la turib, boshqa bir erkak bilan rasmiy nikohi bekor qilinmagan ayolni o‘ziga ikkinchi xotin qilib olgan. Shu bilan ham qoniqmay, ikkinchi xotinining voyaga yetmagan (11 yashar) qizini ham muntazam zo‘rlab kelgan.
Prezident huzuridagi Ijtimoiy himoya milliy agentligi rahbariyatining aralashuvi bilan bolaning huquqlari poymol bo‘lishi oldi olingandi. Agentlik tomonidan jabrlanuvchiga zarur tibbiy, psixologik va ijtimoiy ko‘mak ko‘rsatilgan.
Voyaga yetmagan shaxsga nisbatan jinsiy jinoyat sodir etgan 31 yashar A.K. rad etib bo‘lmas dalillar bilan qo‘lga olingan. Unga nisbatan Jinoyat kodeksining 119-moddasi 4-qismi (jinsiy ehtiyojini zo‘rlik ishlatib g‘ayritabiiy usulda o‘n to‘rt yoshga to‘lmagan shaxsga nisbatan qondirish) bilan jinoyat ishi qo‘zg‘atilgan.
Sud hukmi bilan erkak Jinoyat kodeksining 168-moddasi 4-qismi “a” bandi, 126-1-moddasi 3-qismi, 25,119-moddasi 4-qismi, 119-moddasi 4-qismi bilan tayinlangan jazolar aslicha qoldirilib, Jinoyat kodeksining 59-moddasiga asosan, tayinlangan jazolarni qisman qo‘shish yo‘li bilan o‘tash uchun 16 yil 6 oy ozodlikdan mahrum qilish jazosi tayinlandi.
Hukm qonuniy kuchga kirgach, undan jabrlanuvchi foydasiga jinoyat oqibatida yetkazilgan 254 653 783 so‘m moddiy zarar undirilishi belgilangan.
Turkiyada o‘gay otasi jinsiy tajovuz qilgan o‘zbekistonlik qiz vatanga qaytarilgani xabar qilingan edi.
2025-yil 26-may kuni Toshkent shahrida O‘zbekiston Respublikasi prezidenti huzuridagi Ijtimoiy himoya milliy agentligi va BMTning Bolalar jamg‘armasi — YUNISEF hamkorligida davra suhbati tashkil etildi. Konferensiyada “Majburiyatdan harakatga: bolalarga nisbatan zo‘ravonlikka barham berish bo‘yicha strategiya va milliy istiqbollar” mavzusi muhokama qilindi.
2024-yilda O‘zbekistonda bolalar huquqlari buzilishi bilan bog‘liq quyidagi holatlar qayd etilgan:
- 412 nafar bola jinsiy zo‘ravonlikdan jabrlangan;
- 1 028 nafar bola jismoniy zo‘ravonlikka uchragan;
- 929 nafar bola psixologik bosimni boshidan kechirgan;
- 14 nafar bola ekspluatatsiya qurboni bo‘lgan;
- 106 nafar bola kattalarning qat’iy befarq munosabatiga duch kelgan.
Izoh (0)