IndiGo aviakompaniyasi Mumbaydan Toshkentga to‘g‘ridan-to‘g‘ri reyslarni yo‘lga qo‘ymoqda. Bu haqda Uzbekistan Airports xabar berdi.
Unga ko‘ra, Hindistonning loukoster aviakompaniyasi Toshkentga ikkinchi yo‘nalishni ochmoqda. 2025-yil 1-avgustdan aviatashuvchi Mumbay—Toshkent—Mumbay yo‘nalishi bo‘yicha muntazam qatnovlarni amalga oshirishni boshlaydi. Reyslar haftasiga to‘rt marta dushanba, chorshanba, juma va yakshanba kunlari Airbus A320 samolyotlarida amalga oshirilishi rejalashtirilgan.
IndiGo — bosh qarorgohi Hindistonning Gurgaon shahrida joylashgan hind xususiy loukoster aviakompaniyasi. Kompaniya muntazam qatnovlar soni va samolyotlar soni bo‘yicha mamlakatdagi eng yirik aviatashuvchi hisoblanadi. IndiGo 2023-yil sentyabr oyidan Dehli—Toshkent—Dehli yo‘nalishi bo‘yicha O‘zbekistonga muntazam reyslarni amalga oshirib kelmoqda.
Yangi yo‘nalish — Mumbay, ilgari Bombey nomi bilan tanilgan, Hindistonning moliyaviy markazi va dunyodagi aholi eng zich joylashgan shahar markazlaridan biri. Hindistonning g‘arbiy sohilida Arab dengizi bo‘yida joylashgan shahar Bollivudning yuragi hamda savdo, moda va ko‘ngilochar markazi hisoblanadi.
Hindistonning IndiGo aviakompaniyasi 2024-yil 17-avgustdan Dehli—Toshkent—Dehli yo‘nalishi bo‘yicha muntazam yo‘lovchi qatnovlari sonini haftasiga to‘rt martadan yetti martagacha oshirgan edi. Ushbu aviakompaniya 2023-yil 22-sentyabrdan O‘zbekistonga muntazam parvozlarni boshlagan.
Izoh (0)