O‘zbekiston va Sharqiy Afrikada joylashgan Eritreya o‘rtasida diplomatik munosabatlar o‘rnatildi.
Eritreyaning BMTdagi (Nyu York) doimiy vakolatxonasining ma’lum qilishicha, 11-iyul kuni O‘zbekiston va Eritreya o‘rtasida diplomatik munosabatlar o‘rnatish to‘g‘risidagi qo‘shma kommyunike imzolandi.
Hujjatni ikki davlat hukumatlari nomidan O‘zbekistonning BMTdagi doimiy vakili Ulug‘bek Lapasov hamda Eritreyaning BMTdagi doimiy vakili Sofiya Tesfamariam Yoxannes imzolagan.
Eritreya — Afrikaning shimoli-sharqida, Qizil dengiz bo‘yida joylashgan davlat bo‘lib, Sudan, Efiopiya va Jibuti bilan chegaradosh.
Ushbu mamlakat O‘zbekiston rasmiy davlatlararo munosabatlar o‘rnatgan 161-davlat bo‘ldi. G‘arbiy Afrika mamlakati — Kot-d’Ivuar O‘zbekiston bilan diplomatik munosabatlar o‘rnatgan 160-davlat bo‘lgandi. Undan avval Nauru, Surinam, Somali davlatlari bilan diplomatik munosabatlar o‘rnatilgandi.
Izoh (0)