Toshkent viloyati Bo‘stonliq tumanidagi Chorvoq suv ombori bo‘yida Sea Breeze Uzbekistan sayyohlik majmasi qurilishi kutilmoqda. Biroq loyiha hujjatlari hali hukumatga taqdim etilmagan. Bu haqda 23-iyul kuni Toshkent shahrida o‘tkazilgan matbuot anjumanida ekologiya vaziri Aziz Abduhakimov maʼlum qildi, deya xabar berdi “Daryo” muxbiri.
Aziz Abduhakimovning aytishicha, loyiha to‘g‘risida norasmiy ravishda — og‘zaki aytilgan. Ammo zarur hujjatlar hozircha taqdim etilmagan.
“Shuning uchun hujjatni olib kelishlarini iltimos qildik. Hujjat bo‘lgandan keyin o‘zimiz ham, Qurilish vazirligi, Suv xo‘jaligi vazirligi va boshqa tegishli vazirlik hamda idoralar eʼtirozlari yoki takliflarini bildira oladi. Hali hujjat yo‘q, lekin bizlar “yo‘q bo‘lmasin” demoqdamiz. Oldin hujjat kelsin. Bir narsaga “yo‘q” deyishdan avval, u narsa paydo bo‘lishi kerak. Hali bizda taklif ham, hujjat ham yo‘q”, dedi vazir.
Aziz Abduhakimov loyiha hujjatlari taqdim etilgach, majmua qurilishi masalasi jamoatchilik muhokamasiga qo‘yilishiga vaʼda berdi.
“Menimcha, uni bekitib, kechasi shunday qo‘l qo‘yib, chiqarib yuboradigan odam yo‘q respublikada”, dedi vazirlik rasmiysi.
Vazir so‘zlariga ko‘ra, developer o‘z-o‘zidan kelib, Chorvoqda qurilish qilmoqchi bo‘lmagan, balki tadbirkor tajribali ekani sabab O‘zbekiston tomoni uni mamlakatga taklif qilgan.
“Uning minglab takliflari bor. Hozir mana kim eshitgan bo‘lsa, Qirg‘iziston ham chaqiryapti, Qozog‘iston ham. Turkiyada juda katta loyihalarni amalga oshiryapti. Yana Chernogoriyaga borib loyiha qilaman, deyapti. Shuning uchun men aytmoqchi bo‘lganim, bizlar yo‘q deyishdan oldin taklifini bir ko‘raylik. Oldin taklifini bersin, ko‘raylik o‘zi nima taklif qilayotganini. Hali ko‘rmasdan yo‘q deyishimiz, menimcha, aqlga to‘g‘ri kelmaydigan narsa”, degan Aziz Abduhakimov.
Maʼlumot uchun, joriy yil 14-aprelda prezident Shavkat Mirziyoyevga Sea Breeze Uzbekistan xalqaro turizm markazi master-rejasi taqdim qilingan. Umumiy qiymati 10 mlrd dollarlik loyiha Chorvoq suv ombori bo‘yida, ozarbayjonlik tadbirkor Emin Agalarov tomonidan amalga oshirilishi maʼlum. Majmua ko‘prik, xiyobon, plyaj, mehmonxonalar, kottejlar, uylar, restoran va tomoshagohlarni qamrab olishi anons qilingan. Davlat rahbari majmuani zarur infratuzilma bilan taʼminlash bo‘yicha ko‘rsatmalar bergan.
Loyiha Chorvoqning 577 gektar yer maydonini egallashi ko‘zda tutilgan. Dastlabki bosqichda 100 gektar hudud qamrab olinadi.
Chorvoq suv ombori Toshkent shahri va atrofdagi hududlar uchun asosiy chuchuk suv manbai hisoblanadi. Shu sabab uning sohilida quriladigan majmua loyihasi ijtimoiy tarmoqlarda faollar noroziligiga sabab bo‘ldi. Xususan, qurilish ishlari sababli ichimlik suvi ifloslanib, uning sathi keskin tushib ketishidan xavotir bildirildi. Qolaversa, hududdagi daraxtlar kesilib, yashillikka putur yetishi, odamlar suv sohiliga kirishiga cheklovlar kiritilishi mumkinligi ham etirozlar uyg‘otgan.
Izoh (0)