2025-yilda Toshkent shahriga 8 mlrd dollar miqdorida sarmoyalar kiritiladi. Bu haqda bugun, 10-iyul kuni prezident Shavkat Mirziyoyev Toshkent shahri Shayxontohur tumaniga tashrifi chog‘ida maʼlum qildi.
Prezident axborot xizmati xabarga ko‘ra, davlat rahbari Shayxontohur mahallalaridagi qurilish, sanoat va boshqa sohalar rivoji qanday ketayotgani bilan tanishgan. Xususan, “Yangi Kamolon” mahallasida bo‘lib, hudud aholisi bilan suhbatlashgan.
“So‘nggi yillarda ko‘p korxonalar ochildi, iqtisodiyot o‘syapti. Shu bilan birga, yoshlarimiz ham yetishib kelyapti. Ularning taʼlim-tarbiyasi, sog‘ligi, ish o‘rinlarini hozirdan o‘ylashimiz kerak. Shuning uchun bu yil Toshkent shahriga 8 milliard dollar investitsiya olib kelyapmiz. Buning hisobidan Shayxontohurda ham yangi-yangi ish joylari, taʼlim maskanlari, infratuzilma inshootlari bo‘ladi”, degan Shavkat Mirziyoyev.
Maʼlum qilinishicha, “Yangi Kamolon” mahallasida 4 600 nafardan ziyod aholi yashaydi. Hududda 60 dan ortiq savdo va xizmat ko‘rsatish shoxobchalarida mahalla yoshlari ish bilan band. Joriy yilda mahallada hunarmandlar maskani, dala mahsulotlari va qandolatchilik do‘konlari, novvoyxona tashkil etildi, xususiy tibbiyot punkti ochildi. Natijada mahalla ishsizlikdan xoli hududga aylandi.
“Shayxontohurda hunarmandchilik azaldan bo‘lgan. Bugun ham tumanda odamlarni ish bilan, daromad bilan taʼminlashda bu katta manba. Shuning uchun Shayxontohur misolida xizmatlar sohasini rivojlantirish bo‘yicha yangi chora-tadbirlar rejasini qabul qilamiz”, degan prezident.
Shu bilan birga, mahalladagi kabi kichik kutubxonalarni boshqa mahallalarda ham tashkil etish muhimligi taʼkidlangan.
Izoh (0)