Majburiy ijro byurosidan salkam 19 milliard so‘m qarzdorligi mavjud Xorazm viloyati hokimligi qimmatbaho avtomobillar xarid qilmoqda. Bu haqda Telegram’dagi “Revizor.uz” kanali xabar tarqatdi.
Maʼlum bo‘lishicha, viloyat hokimligi 2025-yilning 4-iyun kuni UzAutoMotors AJning hududdagi vakili bilan uchta shartnoma imzolab, Traverse va Malibu-2 avtomobillarini xarid qilishga kirishgan.
Jumladan, hokimlik shartnomaga ko‘ra, rasmiy dillerga ikkita Traverse premier-2 avtomashinasi va 1 dona Malibu-2 avtomobillari uchun 1 milliard 734 million 462 ming so‘m mablag‘ to‘lab beradi.
Qimmatbaho avtomobillar xaridini amalga oshirayotgan hokimlikning MIBdan 18 milliard 813 million so‘m qarzdorligi mavjud.
“Daryo” jurnalisti bilan suhbatda bo‘lgan Xorazm viloyati hokimligi axborot xizmati rahbari Odilbek Adamboyev mazkur avtomobillar aynan kimlar uchun, qaysi lavozimdagi kadrlar uchun xarid qilinayotganidan bexabar ekanini aytdi. Shuningdek, u jurnalistning ayni kunda viloyat hokimligidagi xizmat avtomobillari soni nechta degan savoliga ham aniqlik kiritmadi.
Biroq tez orada batafsil ma’lumot berishini bildirdi. “Bu haqdagi maʼlumotni ko‘rib, keyin aytsam bo‘ladi”, deydi u.
Viloyat hokimligi saytidagi maʼlumotlar 2022-yildagi holat bo‘yicha axborot beradi va o‘sha davrda hokimlik balansida 15 ta xizmat avtomobillari borligi maʼlum qilingan.
Izoh (0)