Toshkent viloyatining Bo‘ka tumanida 19 yoshli ayol va uning homilasi o‘limiga sababchi bo‘lgan akusher-ginekologga jazo tayinlandi. Bu haqda “Milliy” telekanalining “Millar” dasturida ma’lum qilindi.
Voqea 2024-yilning noyabrida yuz bergandi. Marhumaning qarindoshlari 19 yoshli kelinning o‘limiga qandaydir ukol sabab bo‘lganini aytgandi. Bo‘ka tuman tibbiyot birlashmasi boshlig‘i vazifasini bajaruvchi Shahboz Rustamov marhuma o‘limida shifokorlarning aybi yo‘q deb hisoblagandi.
Sud hujjatlarida ayolning o‘limiga allergik reaksiya oqibatida rivojlangan anafilaktik shok, o‘tkir yurak va nafas qon tomiri yetishmovchiligi sabab bo‘lgani ko‘rsatilgan. Ayolning salomatligi to‘liq o‘rganilmasdan, unga dori vositasi yuborilgan.
Holat yuzasidan sud ishi jinoyat ishlari bo‘yicha Bo‘ka tumani sudida ko‘rib chiqildi. Sud hukmiga ko‘ra, sudlanuvchi ayol Jinoyat kodeksining 116-moddasi (kasb yuzasidan o‘z vazifalarini lozim darajada bajarmaslik) 4-qismi “b” bandida nazarda tutilgan jinoyatni sodir etganlikda aybdor deb topilgan. Unga nisbatan 3 yil muayyan huquqdan, ya’ni sog‘liqni saqlash tizimlarida tibbiy faoliyat bilan shug‘ullanish huquqidan mahrum etilib, 4 yil 6 oy muddatga ozodlikni cheklash jazosi tayinlandi.
Izoh (0)