Jizzaxda bedarak yo‘qolgan 2 yoshli bola o‘lik holda topildi. Bu haqda “Daryo”ga Bosh prokuratura matbuot xizmati xabar berdi.
Xorazm viloyati Urganch shahrida yashagan bola 23-iyun kuni ota-onasi bilan Jizzax viloyati Zomin tumani Duoba QFYga kelgan va shu kuni soat 19:30 larda noma’lum tomonga chiqib ketib yo‘qolgandi. Uni topishda yordam berganlar uchun 20 million so‘m mukofot puli e’lon qilingandi.
Bosh prokuratura bergan ma’lumotga ko‘ra, bolaning murdasi Zomin tumani O‘riklisoy qishlog‘ining aholi yashash joyidan 1,5 kilometrdagi uzoqlikdagi tog‘ning so‘qmoq yo‘lida jarohatlar bilan topilgan.
Olib borilgan tergov-tezkor harakatlari natijasida uni shu qishloqda yashovchi fuqaro avtomashinasini orqaga haydagan vaqtida orqa tomoni bilan urib ketgani aniqlangan. Haydovchi bola nafas olmayotganini bilib, yashash uyining yuqori qismidagi daraga olib borib tashlagan.
Holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan bo‘lib, dastlabki tergov harakatlarini davom ettirish uchun Jizzax viloyat IIB huzuridagi TBga yuborilgan.
Jinoyat kodeksiga ko‘ra, transport vositalari harakati yoki ulardan foydalanish xavfsizligi qoidalarini buzish odam o‘lishiga sabab bo‘lsa, muayyan huquqdan mahrum qilib, 7 yilgacha ozodlikdan mahrum qilish bilan jazolanadi.
2024-yilning iyulida Toshkentda bedarak yo‘qolgan 6 yoshli bola jasadi suv to‘la quduqdan topilgandi. 2023-yil martida Samarqandda bedarak yo‘qolgan bola bir yildan so‘ng topilgandi.
Izoh (0)