Ayrim o‘zbekistonliklar BAAga kirishda hali ham qiyinchiliklarga duch kelayotgani aniqlandi.
Tashqi ishlar vaziri matbuot kotibi Ahror Burxonovning ma’lum qilishicha, xalqaro aeroportlarda uzoq davom etgan tekshiruvlar tufayli fuqarolarning ushbu aeroportlarda uzoq vaqt qolib ketayotgani haqida yana murojaatlar kelib tushdi.
“Mamlakatimizning BAAdagi diplomatik vakolatxonalarimiz tomonidan ushbu holatlarni hal qilish maqsadida faol choralar ko‘rilmoqda. Diplomatlarimiz doimiy ravishda vaziyatni monitoring qilib, BAAning immigratsion va boshqa tegishli idoralari vakillari bilan uzluksiz muzokaralar olib bormoqda”, deydi TIV vakili.
Uning qayd etishicha, ushbu muzokaralar fuqarolarimizning mamlakat hududiga imkon qadar tezroq va muammosiz kirishini ta’minlashga qaratilgan bo‘lib, masalani joyida hal qilish uchun barcha sa’y-harakatlar amalga oshirilmoqda.
Shu bilan birga, aeroportlarda yuzaga kelayotgan kechikishlar va tekshiruvlarning sabablari aniqlanmoqda, bu esa masalaning kelib chiqish ildizlarini tushunish va kelajakda bunday holatlarni oldini olishga yordam beradi.
Fuqarolarga imkon qadar qulaylik yaratish maqsadida Abu Dabi shahridagi elchixona va Dubaydagi Bosh konsulxona vakillari doimiy ravishda mahalliy aeroportlarda bo‘lib, o‘zbekistonliklarga ko‘mak bermoqda.
BAAdagi turli aeroportlar orqali mamlakat hududiga kirib kelayotgan xorijliklarning, shu jumladan O‘zbekiston fuqarolarining tekshiruvlari cho‘zilib ketgani haqida xabarlar 2-iyun kuni tarqalgandi. Tashqi ishlar vaziri matbuot kotibi buni tasdiqlab, xavfsizlik choralari kuchaytirilgani sababli aeroportlarda tekshiruv vaqtlari cho‘zilib ketayotganini bildirgandi.
5-iyun kuni BAAda futbol bo‘yicha O‘zbekiston milliy jamoasi JCH-2026 saralashi 3-bosqichi doirasida ushbu mamlakat jamoasi bilan o‘ynaydi. Shu maqsadda aksariyat o‘zbekistonliklar muxlislik qilish uchun BAAga yo‘l olgandi. BAA — O‘zbekiston terma jamoalari o‘rtasidagi bahs Abu Dabidagi “Al-Nahyan” stadionida bo‘lib o‘tadi.
Izoh (0)