Bugun, 10-iyul kuni prezident Shavkat Mirziyoyev Toshkent shahar Shayxontohur tumanidagi “Inson” ijtimoiy xizmatlar markazida bo‘ldi.
Prezident axborot xizmati xabariga ko‘ra, markazda 12 toifadagi muhtoj insonlarga 100 dan ortiq ijtimoiy xizmatlar ko‘rsatilmoqda. Murojaatlar qabul qilish, ehtiyojni baholash, xizmatni belgilash va xizmat ko‘rsatish jarayonlari insonlarga qulay tarzda yo‘lga qo‘yilgan.
Qolaversa, ijtimoiy xizmatdan foydalanuvchining keyingi holati, o‘zini o‘nglashi ham monitoring qilib boriladi. Barcha jarayonlar raqamlashtirilgan va mas’ul tashkilotlar bilan bog‘langan.
Shayxontohurdagi markazda 25 nafar mutaxassis hamda mahallalarda 51 nafar ijtimoiy xodim faoliyat ko‘rsatmoqda. Nogironligi bo‘lgan bolalar va shaxslar, yolg‘iz keksalar bilan manzilli tarzda ish yuritilmoqda.
“Bu yer har bir insonning dardi bilan yashaydigan, ularni rozi qiladigan dargoh. Bu tizim orqali jamiyatimizda ijtimoiy adolat, inson qadri qaror topadi”, degan prezident.
Markaz hududida davlat-xususiy sheriklik asosida “Imkoniyatlar olami” muassasasi tashkil etilgan. Davlat rahbari undagi sharoitlarni ham ko‘zdan kechirdi.
Muassasada uch yoshgacha go‘daklar uchun erta aralashuv, nogironligi bo‘lgan bolalar uchun ijtimoiy moslashuv va reabilitatsiya, shuningdek, kunduzgi parvarish va qarab turish xizmatlari tashkil etilgan. Hozirda bu 80 ga yaqin insonning og‘irini yengil qilmoqda. Ularga 12 nafar malakali xodim mehr-eʼtibor ko‘rsatmoqda.
Izoh (0)