O‘zbekistonda jinsini o‘zgartirganlar endi ism-familiyasini ham o‘zgartirsa bo‘ladi

Vazirlar Mahkamasi qarori bilan O‘zbekistonda jinsini o‘zgartirganlar endi ism-familiyasini ham o‘zgartirsa bo‘ladi.

Vazirlar Mahkamasining “Nikoh, oila va fuqarolik holati dalolatnomalarini ro‘yxatga olish sohasidagi normativ-huquqiy hujjatlarni tizimlashtirish to‘g‘risida”gi qaroriga kiritilgan o‘zgarishlarga ko‘ra, 18 yoshga to‘lgan va voyaga yetmagan farzandlari bo‘lmagan shaxslar familiyasi, ismi va otasining ismini o‘zgartirish bo‘yicha arizalarni Yagona interaktiv davlat xizmatlari portali orqali ham berishi mumkin bo‘ladi. 

Shuningdek, familiyasi, ismi va otasining ismini o‘zgartirish bo‘yicha arizalar “Davlat tili to‘g‘risida”gi qonunga muvofiq:

• sudning qonuniy kuchga kirgan hal qiluv qarori asosida;
• agar familiyasi va ismi eshitilishda yoqimsiz bo‘lsa;
• agar shaxsning familiyasi va ismi millatiga to‘g‘ri kelmasa;
• xohishiga qarab o‘zining nikohgacha bo‘lgan familiyasiga qaytishda;
• oila uchun umumiy familiyada bo‘lish istagi paydo bo‘lganda;
• jinsi o‘zgarganda (bunda sog‘liqni saqlash muassasasidan jinsni o‘zgartirgani to‘g‘risida tibbiy xulosa taqdim etilishi kerak);
• 16 yoshga to‘lgan shaxsga nisbatan otalikni belgilashda ko‘rib chiqiladi.

Bunga qadar (139-bandga ko‘ra) jinsini o‘zgartirgan taqdirda tug‘ilganlik, vafot etganlik, nikoh va boshqa guvohnomalarga o‘zgartirish kiritish mumkin edi, biroq ism-sharifni faqat tarixiy va milliy an’analar asosida, O‘zbekiston Respublikasi “Davlat tili to‘g‘risida”gi qonunning 15-moddasiga binoan o‘zgartirishga ruxsat berilgan edi.