Quyoshdan himoyalovchi kremni to‘g‘ridan-to‘g‘ri quyosh nurlari ostida yoki yuqori haroratda qoldirish mumkin emas. AQSHning Oziq-ovqat va dori-darmonlarni nazorat qilish boshqarmasi (FDA) SPF vositalaridan foydalanishdagi tez-tez uchraydigan xatolarga ishora qildi, deb yozadi HuffPost.
Mutaxassislar yuqori haroratda SPFli kosmetika vositalari himoya xususiyatlarini yo‘qotishi haqida ogohlantirdi. Shu sababli teri ultrabinafsha nurlarining yuqori dozalariga duchor bo‘ladi, bu esa kuyish va teri saratoni xavfini oshiradi.
Bunga yo‘l qo‘ymaslik uchun FDA mutaxassislari kremni salqin joyda saqlashni va uni uyda surtishni maslahat berishadi. Agar siz ko‘chada ikki soatdan ko‘proq vaqt bo‘lishni rejalashtirmoqchi bo‘lsangiz, kremni konteynerga yoki sumkaga solib, so‘ngra sochiq bilan o‘rash kerak. Shunday qilib, krem qutisidagi harorat sekinroq ko‘tariladi.
Shuningdek, mutaxassislar aksariyat odamlar terini himoya qilish uchun yetarli bo‘lmagan miqdorda krem surtishiga eʼtibor qaratdi. Plyajda har ikki soatda olti-sakkiz choy qoshiq kremdan foydalanish tavsiya etiladi.
Bundan tashqari, quyoshdan himoyalovchi kremlardan foydalanganda boshqa xavfsizlik choralarini ham eʼtibordan chetda qoldirmaslik kerak: quyoshli havoda soyada bo‘lishga harakat qilish, shlyapa, ko‘zoynak va yenglari uzun yengli kiyim kiyish kerak.
Izoh (0)