Joriy yil yarmida chet elga doimiy yashash maqsadida ko‘chib ketganlar soni 2024-yil mos davriga nisbatan 10 foiz atrofida oshdi. Bu haqdagi maʼlumotlar Statistika qo‘mitasining navbatdagi sharhida keltirilgan.
Olti oy davomida O‘zbekistondan 5 ming 551 kishi xorijga doimiy yashash uchun ko‘chib ketgan. Biroq avvalgilardan farqli ravishda aholi qaysi davlatlarga borgani ochiqlanmagan.
Taqqoslash uchun, 2024-yil I yarmida 5 ming 66 o‘zbekistonlik chet davlatlarga ko‘chgandi. Bunda eng ko‘p ulush qo‘shni Qozog‘iston hissasiga to‘g‘ri kelgan — 4 ming 128 kishi. Keyingi o‘rinda Rossiyani (760 kishi) tanlovchilar ko‘proq bo‘lgan.
Joriy yil I yarmida O‘zbekistonga xorijdan ko‘chib kelganlar soni 673 kishi bo‘ldi. O‘tgan yilning mos davrida bu raqam 1 ming 80 ta edi.
Xorijga ko‘chish tendensiyasi
2024-yilda jami 10 ming 842 nafar o‘zbekistonlik xorijiy davlatlarga doimiy yashash uchun ko‘chib ketgan. Xususan, Qozog‘istonga 8 ming 792 kishi, Rossiyaga 1 ming 601 kishi borgan. Mamlakatni tark etganlar ulushi yana Janubiy Koreya (96 kishi), Qirg‘iziston (73 kishi), Turkmaniston (39 kishi) va boshqa mamlakatlar (241 kishi) hissasiga to‘g‘ri kelgan.
Bir yil avvalgi raqamlarga qaraganda, yaʼni 2023-yilda chet elga ko‘chib ketganlar soni 17 ming 336 kishi bo‘lgan. Jumladan, Qozog‘istonning o‘ziga 14 ming 51 kishi, Rossiyaga 2 ming 670 odam ko‘chib ketgan.
Bundan o‘n yillar oldingi raqamlar ancha katta edi. Masalan, 2010-yilda O‘zbekistondan xorijga 44 ming 420 kishi, 2011-yilda 50 ming 816 kishi, 2012-yilda 45 ming 447 kishi ko‘chib ketgan. 2015-yildan chetga ko‘chish trendi sezilarli pasaya boshlagan, yil davomida 31 ming 765 kishi mamlakatni tark etgan.
Izoh (0)