Taksi haydovchilarini doimiy yashash joyida ishlashga majburlash ahmoqlik, deydi Strategik islohotlar agentligi direktorining birinchi muovini, iqtisod fanlari doktori Abdulla Abduqodirov.
O‘zbekistonda yo‘nalishsiz taksi haydovchilari doimiy yashash hududidagina litsenziya olishi va ishlashi mumkinligi maʼlum qilindi. Abdulla Abduqodirov Toshkent xalqaro investitsiya forumida “Daryo”ga bergan intervyusida mazkur qarorga munosabat bildirdi.
“Toshkentda tirbandlik judayam ko‘payib ketgan. Shuning sababchilaridan biri taksilar ko‘paygani. Lekin taksi sohasida raqobat borligi uchun narxlar arzon. Ularni viloyatlarga qaytargan bilan tirbandlik kamaymaydi. Bilmadim, maqsad nima, lekin men bunga juda ham qarshiman. Bu hamma uchun yomon taʼsir qiladi. Masalan, ish o‘rinlarini yaratishda salbiy effekt beradi. Taksidagi raqobatga putur yetkazadi. Hozir asosiy vazifamiz nima? Ish o‘rinlari yaratish, o‘zini o‘zi band qilganlarni har tomonlama qo‘llab-quvvatlash. Biz bunaqa noto‘g‘ri qarorlar bilan teskari tomonga intilamiz. Yuqori tribunalardan bitta siyosat yuritamiz, amaliyotda boshqa narsa bo‘lib qoladi. Bunaqa bo‘lmasligi kerak”, dedi iqtisodchi.
Toshkent shahrida yo‘nalishsiz taksi faoliyati bilan shug‘ullanishda haydovchilarning faqat o‘z hududi va unga tutash hududlarda xizmat ko‘rsatishi belgilangani keng jamoatchilik o‘rtasida bahs-munozaralarga sabab bo‘lmoqda. Xalq demokratik partiyasi mazkur holatni o‘rganib, bu kabi cheklovlar O‘zbekistonning yangi tahrirdagi Konstitutsiyasiga zid ekanini maʼlum qildi. Shu bilan birga, partiya Transport vaziridan masalaga tushuntirish berishini so‘radi.
Izoh (0)