Buxoro shahridagi tibbiyot markazida daraxtlarni noqonuniy ko‘chirgan mansabdorlarga jinoyat ishi qo‘zg‘atildi. Bu haqda Ekologiya, atrof-muhitni muhofaza qilish va iqlim o‘zgarishi vazirligi xabar berdi.
Ma’lum qilinishicha, Buxoro shahri “Sheyxon” MFY hududida joylashgan tibbiyot markazida radiologiya bo‘limini qurilish-ta’mirlash ishlari amalga oshirilayotgan paytda, ushbu obyekt atrofi o‘rab olinganidan foydalanib, “M.G.” MChJ mansabdor shaxslari tomonidan qonunbuzarlikka yo‘l qo‘yilgan. Ya’ni tibbiyot markazi hududida daraxtlar noqonuniy tarzda ko‘chirilgan.
O‘rganish jarayonida hududdan jami 38 tup qimmatbaho daraxt ko‘chirib o‘tkazilgan bo‘lib, ularning 26 tupi nobud bo‘lgani aniqlandi. Oqibatda tabiatga 170 million 62 ming 500 so‘m miqdorida moddiy zarar yetkazilgan.
Holat yuzasidan tegishli hujjatlar prokuratura organlariga taqdim etilib, jinoyat ishi qo‘zg‘atilgan. Tergov harakatlari olib borilmoqda.
Mart oyida Farg‘ona viloyati Quvasoy shahrida 270 tup daraxt noqonuniy ko‘chirilgani aniqlangandi. Hokimlik mansabdor shaxslarining noto‘g‘ri qarorlari va noqonuniy topshiriqlari oqibatida ko‘chirilgan daraxtlar kelgusida nobud bo‘lishi xavfi yuqori bo‘lgan yer maydonlariga ekilgan. Buning oqibatida tabiatga 1 mlrd 829 mln 437 ming 500 so‘m zarar yetkazilgan.
Izoh (0)