Amsterdam universiteti astronomlari g‘ayrioddiy TOI-2431 b ekzosayyorasini kashf etishdi. Bu sayyorada bir yil atigi 5,4 Yer soatida “o‘tib ketadi”. U Yerdan bor-yo‘g‘i 117 yorug‘lik yili uzoqlikda joylashgan. Bu haqda arXiv preprintlar saytida e’lon qilingan maqolada ma’lum qilingan.
Ushbu obyekt NASA’ning TESS kosmik teleskopi yordamida aniqlangan. Olimlarning aytishicha, TOI-2431 dagi yil ekzosayyoraning o‘z yulduzi atrofida aylanishining eng qisqa davrlaridan biri hisoblanadi. Taqqoslash uchun: Yer Quyosh atrofini aylanib chiqishi uchun 365 kun sarflasa, TOI-2431 b shu vaqt ichida 1600 martadan ortiq aylanishga ulguradi.
Sayyora o‘z yulduziga juda yaqin - atigi 933 ming kilometr (0,0063 astronomik birlik) masofada joylashgan. Bunday yaqinlik uning sirtini taxminan 2000 Kelvin (1727 °C atrofida) darajasigacha qizdiradi. Bu harorat toshlar va metallarni eritish uchun yetarli.
Sayyoraning o‘lchami Yerga o‘xshash bo‘lsa-da, TOI-2431 b xususiyatlari jihatidan undan keskin farq qiladi. Uning radiusi deyarli bir yarim barobar, massasi esa 6,2 marta katta. O‘rtacha zichligi bir kub santimetrga 9,4 grammni tashkil etadi - bu Yernikidan ancha yuqori.
Yaqin yulduz tomonidan hosil qilingan kuchli tortishish kuchlari tufayli sayyoraning shakli o‘zgargan. Olimlarning taxminiga ko‘ra, uning o‘qlaridan biri ikkinchisidan taxminan 9 foizga qisqaroq bo‘lib, bu TOI-2431 b ga mukammal sferik emas, balki yassilangan shakl beradi.
Shuningdek, tadqiqotchilarning fikricha, sayyora halokatga uchrashi mumkin. Olimlarning hisob-kitoblariga ko‘ra, 31 million yildan so‘ng u o‘z yulduzi tomonidan yutib yuboriladi. Bu o‘ta qisqa aylanish davriga ega sayyoralarda kuzatilgan eng qisqa “gravitatsion parchalanish” muddatlaridan biridir.
Izoh (0)