3D-modellashtirish bo‘yicha mutaxassis Sisero Moraes birinchi marta Lyudvig van Betxovenning tashqi ko‘rinishini tikladi. Bu haqda Daily Mail OrtogOnLineMag jurnalida chop etilgan tadqiqotga tayanib xabar berdi.
Ish davomida 1863-yilda Bonn muzeyi buyurtmasi bo‘yicha olingan Betxoven bosh suyagining fotosuratlari va 1888-yilda to‘plangan o‘lchovlar ishlatilgan. Tomografiya va yevropaliklarda yumshoq to‘qimalarning qalinligi to‘g‘risidagi maʼlumotlar yordamida bir xil bosh suyagining modeli 3D-grafikada qayta yaratildi.
Shundan so‘ng obraz sochlar, kiyimlar va yuz ifodasi bilan to‘ldirildi. Ushbu detallar rassom Iozef Karl Shtilerning 1820-yildagi portreti asosida qayta yaratilgan. Elementlarning bir qismi neyron tarmoq yordamida qayta ishlangan.
Kompozitorning bosh suyagi shikastlangan bo‘lishiga qaramay — unda kesmalar izlari ko‘rinib turibdi — uning ishonarli qiyofasini yaratishga muvaffaq bo‘lindi. “Avval bosh suyagi fotosuratlari asosida ikki o‘lchovli konturlarni, frontal va yon tomonlarini yaratdim. Keyin suratlarning proporsiyalari asosida bosh suyagining uch o‘lchovli modelini qurdim. So‘ngra, tirik yevropaliklarning maʼlumotlari asosida yumshoq to‘qimalarning qalinligini qo‘shdim, burun shakli va yuz konturini aniqladim. Bularning barchasi asosiy tasvirni olish imkonini berdi”, deb tushuntirdi mutaxassis.
Bundan tashqari, Betxoven zamondoshlarining uning xatti-harakatlari haqidagi noaniq yozuvlariga qaramay, Moraes kompozitorning ichki zo‘riqishi va ajoyib ish qobiliyati bir-biri bilan chambarchas bog‘liq, deb hisoblaydi. Uning taʼkidlashicha, muallif musiqadan tayanch topgan va hayot qiyinchiliklarini ijod orqali yengib o‘tgan.
Avvalroq maʼlum bo‘lishicha, Betxovenning DNK tahlili uning musiqaga genetik moyilligi pastligini ko‘rsatgan. Xususan, olimlar kompozitor ritmlarni sinxronlashtirish uchun muhim tabiiy qobiliyatlarga ega emasligini aniqlashdi.
Izoh (0)