O‘zbekiston, Qirg‘iziston va Xitoylik botanik olimlarning hamkorlikdagi izlanishlari natijasida boshoqdoshlar oilasiga mansub sulibosh turkumidan fan uchun mutlaqo yangi bo‘lgan o‘simlik turi kashf etildi. Bu haqda Fanlar akademiyasi matbuot xizmati xabar bermoqda.
Ta’kidlanishicha, mazkur kashfiyot zamonaviy ilm-fan yutuqlari, ya’ni xloroplast va yadroviy DNK ketma-ketligi tahlillari hamda an’anaviy morfologik tadqiqot metodlari asosida amalga oshirilgan. Elymus turkumining tavsifi, identifikatsiya kaliti (dixotomik aniqlagich), yuqori sifatli tasvirlari, geografik tarqalishi va ekologik xususiyatlari keng yoritilgan holda xalqaro ilmiy hamjamiyat e’tiboriga taqdim etilgan.
Yangi tur o‘z nomi bilan Elymus uzbekistanicus — O‘zbekiston sharafiga nomlangan bo‘lib, nafaqat O‘zbekiston florasiga, balki butun O‘rta Osiyo botanika faniga katta hissa bo‘lib qo‘shiladi.
“Ahamiyatli jihati shundaki, bu so‘nggi 57 yil ichida Poaceae oilasidan O‘zbekistonda aniqlangan ilk yangi tur bo‘lib, yurtimizdagi biologik xilma-xillikning hali to‘liq o‘rganilmagan boyligini yana bir bor tasdiqlaydi.
Bundan tashqari, ushbu muhim ilmiy natija O‘zbekiston Milliy gerbariysi (TASH) fondiga asoslanib aniqlangani bilan alohida e’tiborga loyiq. Bu noyob gerbariy fondi nafaqat ilmiy-tadqiqotlar uchun mustahkam asos bo‘lib xizmat qilmoqda, balki milliy boyligimiz, tabiatimiz va tariximizning tirik guvohidir”, deyiladi xabarda.
Tadqiqot natijalari dunyoning nufuzli botanik jurnallaridan biri bo‘lgan PhytoKeys sahifalarida chop etildi.
Fevral oyida O‘zbekistonlik olimlar Buxoro, Navoiy viloyatlari va Qoraqalpog‘iston Respublikasi hududida fan uchun yangi bo‘lgan qo‘ng‘iz turini kashf etgani xabar qilingandi.
O‘tgan yilning noyabr oyida Farg‘ona davlat universiteti ixtiolog olimlari Farg‘ona vodiysi suv havzalaridan fan uchun yangi bo‘lgan yalangbaliq turini kashf etishgandi.
Izoh (0)