1912-yilda cho‘kib ketgan Titanik kemasidan noyob taqinchoq suv yuzasiga olib chiqildi. Bu halok bo‘lgan yo‘lovchilardan biriga tegishli bo‘lgan qora shishadan yasalgan marjon bo‘lishi mumkin. Bu haqda The Daily Mail xabar bermoqda.
Ma’lum qilinishicha, marjon tarqoq bo‘laklar holida topildi va qismlarga bo‘lib chiqarib olingan. U kemaning old va orqa qismlaridan qolgan parchalari orasida joylashgan bo‘lgan. Bo‘laklarni dengiz tubidagi qattiq massadan (konkretsiyadan) ehtiyotkorlik va sabr-toqat bilan ajratib olishga to‘g‘ri kelgan. Qattiq cho‘kindi 3,8 km chuqurlikdagi kuchli bosim sharoitida fizik va kimyoviy jarayonlar natijasida hosil bo‘lgan.
Chiqarib olingach, marjon qayta tiklangan. Buyum murakkab naqshni hosil qiluvchi yurak shaklidagi munchoqlar va qora shishadan yasalgan sakkizburchaklar bilan bezatilgan. Olimlarning ta’kidlashicha, o‘nlab yillar davomida suv ostida yotgan marjon “halokat, vaqt va tabiat” sinovlaridan o‘tgan.
Tadqiqotchilar marjon egasining shaxsini endi aniqlab bo‘lmasligini ta’kidladi. Ehtimol, uning egasi halokat paytida halok bo‘lgandir. Biroq u omon qolganlardan biriga tegishli bo‘lib, to‘s-to‘polonda yo‘qolgan bo‘lishi ham mumkin.
Ta’kidlanishicha, topilgan ushbu buyum 1912-yil modasini chuqurroq o‘rganish imkonini beradi. O‘sha paytda qora taqinchoqlar Viktoriya davrida mashhur bo‘lgan fransuz gagati kabi materiallardan yasalgan.
Ilgari olimlar Titanikning raqamli nusxasini yaratgan edi. Ular suv osti roboti tomonidan olingan suratlarga asoslanishgan. Loyiha kemaning halokati sababini ochib berdi. Ma’lum bo‘lishicha, aysbergning teshiklari kemaning butun uzunligi bo‘ylab o‘tgan. Suv barcha bo‘linmalarga kirib, Titanikni cho‘ktirib yuborgan.
Izoh (0)