Kanadada Britaniya Kolumbiyasi universiteti olimlari daraxt pulpasidan tayyorlangan yangi turdagi batareyani yaratdi. U 60 kun ichida tuproqqa singib ketadi va o‘zidan hech qanday chiqindi qoldirmaydi.
Batareya asosan kam quvvat talab qiluvchi qurilmalarga, jumladan, qo‘l soati, smart ko‘zoynak, GPS qurilmalari va hokazolarga mo‘ljallangan. U sellyulozadan tayyorlangan bo‘lib, bu unga tabiiy parchalanish imkonini beradi. Qurilmada toksik metall va korroziyaga uchrovchi kimyoviy moddalar yo‘q. Aksincha u ekologik toza elektrolitlardan tashkil topgan. Batareyani zaryadlash odatdagidek amalga oshiriladi.
Bu texnologiya elektron chiqindilar muammosiga yechim bo‘lishi mumkin. Chunki u tuproqda erib, o‘zidan zararli moddalar tarqatmaydi. Uni ishlab chiqarish ham ancha arzonga tushadi.
Ma’lumotlarga ko‘ra, har yili 50 million tonnadan ortiq eski telefon, noutbuk, televizor va boshqa elektron qurilmalar chiqindiga tashlanadi. Ulardagi batareyalar tarkibidagi qo‘rg‘oshin, kadmiy va litiy kabi zaharli metallar tabiatga katta zarar keltiradi. Odatdagi litiy-ionli batareyalar qizib ketib, portlashi yoki yonib ketishi mumkin. Ularni qayta ishlash qimmatga tushib, ko‘p energiya talab qiladi.
Izoh (0)