WhatsApp muhim xabarlarga javob berishni unutmaslikka yordam beruvchi yangi funksiyani sinovdan o‘tkazmoqda. Endilikda chatni yuqoriga biriktirib qo‘yish, yulduzcha bilan belgilash yoki xotiraga tayanish o‘rniga, bevosita aynan shu xabarga eslatma o‘rnatish mumkin bo‘ladi.
Yangi funksiya WhatsApp foydalanuvchilarining doimiy muammosiga aylangan holat — muhim xabarga keyinroq javob berishni unutib yuborishni hal qilishga mo‘ljallangan. U allaqachon WhatsApp’ning so‘nggi beta-versiyasida Android qurilmalar uchun mavjud.
Funksiyadan foydalanish uchun kerakli xabar chatini bosib ushlab turish, “Eslatma” (Remind) tugmasini tanlash va taymerni sozlash kifoya. Foydalanuvchi 2, 8, 24 soatga yoki istalgan vaqtda eslatma qo‘yish mumkin. so‘ng belgilangan xabar yonida qo‘ng‘iroqcha belgisi paydo bo‘ladi va vaqt tugagach, ilova shu xabar matni bilan eslatma yuboradi.
Shuningdek, WhatsApp avtomatik eslatmalar ustida ham tajriba o‘tkazmoqda. Ilova foydalanuvchi eng ko‘p muloqot qiladigan chatlardan kelgan, lekin o‘qilmagan xabarlar haqida o‘zi mustaqil ravishda bildirishnoma yuboradi.
Mazkur funksiya Android va iOS’ning barcha versiyalarida qachon paydo bo‘lishi hozircha noma’lum.
Izoh (0)