iPhone 17 ni kutishga asosiy sabab: nima uchun iPhone 16 xarid qilishga shoshmaslik kerak?

Apple 2025-yil sentyabrda yangilangan iPhone 17 modellarini taqdim etishi kutilmoqda. Ular orasida odatdagi versiya, o‘ta yupqa iPhone 17 Air hamda yuqori darajali Pro va Pro Max versiyalari bo‘ladi.

Bu safar barcha modellar birinchi bor 120 Gts yangilanish chastotasiga ega ekran va ProMotion texnologiyasi bilan ta’minlanadi. Ayfon tarixida bu juda muhim o‘zgarish, chunki ilgari bunday xususiyat faqat Pro versiyalarga xos bo‘lgan. Endilikda esa oddiy iPhone bilan Pro o‘rtasidagi tafovut kamayadi. Shunday ekan, iPhone 16 o‘rniga iPhone 17 chiqishini kutish fikri mantiqan to‘g‘ri ko‘rinmoqda.

Shu bilan birga, Apple Pro modellarning o‘ziga xosligini saqlab qolish yo‘lini ham topdi. Insayderlar ma’lumotiga ko‘ra, iPhone 17 Pro va Pro Max versiyalariga butunlay yangi turdagi displey o‘rnatiladi va ekranga yorug‘lik nuri qaytmasligi uchun maxsus qoplama bilan ishlov beriladi. U turli shikastlanishlarga qarshi chidamliroq bo‘lishi ko‘zda tutilgan.

Shuningdek, ular iPad Pro va iMac’dagi nanoto‘rli shishaga o‘xshash maxsus tuzilmaga ega bo‘ladi. Bu texnologiya Apple’ning boshqa qurilmalarida allaqachon sinovdan o‘tgan va ayniqsa yorqin va yorug‘ joylarda ishlaydigan yoki ekrandagi o‘z aksini ko‘rishni yoqtirmaydigan foydalanuvchilar tomonidan iliq kutib olingan.

Agar Apple ushbu yechimni iPhone’ga ham tatbiq etsa, Pro modellarga bo‘lgan qiziqish sezilarli darajada oshishi mumkin. Ayniqsa, iPhone 17 Air modeli nafaqat ingichkaroq va yengilroq, balki ProMotion texnologiyasi bilan ta’minlangan va ehtimol narxi ham arzonroq bo‘lishi mumkin. Yorug‘lik nuri qaytmasligi uchun o‘rnatilgan maxsus ekran qoplamasi tufayli quyosh nurida o‘qish osonlashadi, ko‘zlar kamroq charchaydi.

Avvallari Pro modellarning asosiy ustunligi ProMotion texnologiyasi bo‘lgan bo‘lsa, endilikda displey qoplamasining sifati oldingi o‘ringa chiqmoqda. Aynan shu jihat foydalanuvchini Air modelining jozibasiga qaramay, Pro versiyasini tanlashga undashi mumkin. Agar bu taxminlar o‘z tasdig‘ini topsa, iPhone 17 Pro Apple’ning ko‘zlar uchun eng qulay smartfoni, deb topilishi mumkin.