Abu-Dabi (BAA)da bo‘lib o‘tgan UFC on ABC 9 turnirida ishtirok etgan sportchilarning qancha mukofot puli ishlab topgani ma’lum bo‘ldi. Bu haqda Metaratings nashri Sporty Salaries portaliga tayanib xabar berdi.
O‘zbekistonlik aralash jang san’ati vakili Bogdan Guskov mazkur turnirda rossiyalik Nikita Krilovni mag‘lub etgani uchun jami 64 ming AQSH dollari ishlab topdi. Ushbu summaning 30 ming dollari jangda qatnashgani, 30 ming dollari g‘alaba uchun, 4,5 ming dollari esa homiylik shartnomasiga to‘g‘ri keladi. Qiziqarli jihati shundaki, mag‘lub bo‘lganiga qaramay, Nikita Krilov Guskovdan olti barobar ko‘proq gonorar oldi. U turnir yakunida 371 ming AQSH dollari mukofot puli qo‘lga kiritgan (qatnashgani uchun 350 ming dollar, homiylik shartnomasi uchun esa 21 ming dollar).
UFC on ABC 9 turnirining Top-10 gonorarlari:
- Robert Uittaker – 571 000
- Nikita Krilov – 371 000
- Mark-Andre Barrio – 366 000
- Muslim Salixov – 311 000
- Renye de Ridder – 266 000
- Deyvi Grant – 261 000
- Brays Mitchell – 235 000
- Tabata Richchi – 216 000
- Petr Yan – 211 000
- Said Nurmagomedov – 161 000
E’tiborga molik jihat shundaki, Nikita Krilov nafaqat Bogdan Guskovdan, balki sobiq chempion Petr Yan, Shara Bullet, Muslim Salixov kabi bir qator jangchilardan ham ko‘proq gonorar olgan. Undan faqat bosh jangda ishtirok etgan Robert Uittaker yuqoriroq mukofot – 571 ming dollar olgan.
Ma’lumot uchun, Bogdan Guskov reytingda o‘zidan baland o‘rinda turgan Nikita Krilovni UFC on ABC 9 turnirida birinchi raunddayoq texnik nokaut evaziga mag‘lub etgan.
Izoh (0)