UFC afsonasi, yengil vazn toifasining sobiq chempioni Habib Nurmagomedov MМА’ga qaytishi haqida fikr bildirdi. 36 yoshli sportchi bu haqda YouTube’dagi “Adam Zubayraev” kanaliga bergan intervyusida so‘z yuritdi.
Nurmagomedovning aytishicha, uzoq tanaffusdan so‘ng yana oktagonga qaytish va avvalgi sport formasini tiklash oson emas. Unga ko‘ra, sportchining jismoniy ko‘rinishidan ko‘ra, qancha va qanday sparring mashg‘ulotlari o‘tkazgani muhimroq ahamiyatga ega.
Menga ikki-uch oy yetadimi? Yo‘q. Ikki oydan keyin men 37 yosh bo‘laman. Nazariy jihatdan qarasak, kamida yarim yil tayyorgarlik kerak. Ba’zan jangchilarning sport formasi ko‘p narsani hal qiladi deyishadi, lekin bu hech narsani anglatmaydi. Asosiysi — qancha sparring o‘tkazgani va bu sparring kimlar bilan bo‘lgani katta ahamiyatga ega, — dedi Nurmagomedov.
Shuningdek, u ММА’ni boshqa sport turlaridan tubdan farq qilishini alohida ta’kidladi:
Zalda mashq qilish, yugurish, fitnes — bu bizning sport emas. Bizning sport — bu jang. Sen oktagonga chiqib, raqibing bilan yuzma-yuz urushasan. Bu yerda kurash, tay-klinch, grek-rim uslubi, grappling, muay-tay, kikboksing — barchasi mujassam. Agar tayyorgarlikda faqat kurash bilan shug‘ullangan bo‘lsang, jangda juda qiynalasan.
Habibning fikricha, jangchining tashqi ko‘rinishi orqali uning real imkoniyatiga baho berish xato bo‘ladi:
Sportchining qomatiga yoki mushaklariga qarab uning tayyorgarligini baholash mumkin emas. ММА hali nisbatan yosh sport turi, hali to‘liq o‘rganilmagan. Eng asosiysi — oktagonda nimalarga qodirliging.
Eslatib o‘tamiz, Habib Nurmagomedov 2020-yilning oktyabr oyida professional faoliyatini yakunlagan edi. U UFC’dagi faoliyati davomida 29 ta jang o‘tkazib, ularning barchasida g‘alaba qozongan. Hozirda sobiq sportchi murabbiylik faoliyati bilan shug‘ullanmoqda.
Izoh (0)