Jazoirda mahalliy futbol jamoasi “MC Alger” chempionlik unvonini qo‘lga kiritdi. Final hushtagi chalinishi bilanoq stadionning yuqori tribunasi to‘sig‘i sinib, muxlislar yiqilib tushgan. Oqibatda 3 kishi halok bo‘lgan. Bu haqda BBC xabar berdi.
Mahalliy ommaviy axborot vositalariga ko‘ra, Jazoirdagi “5-iyul” stadionida muxlislar g‘alabani nishonlayotganda to‘siq sinib, ular pastga qulab tushgan. O‘nlab odamlar jarohatlangan. Uchta shifoxonada 70 dan ortiq odam davolanayotgani haqida xabar berilgan.
“MC Alger” jamoasi futbolchilari va xodimlari jarohatlanganlarga qon topshirish uchun shifoxonaga borgani aytilgan. Jazoir prezidenti Abdulmajid Tabbun voqea yuzasidan hamdardlik bildirib, jarohatlanganlarga tezroq sog‘ayib ketishini tilagan.
Stadion 2024-yili ham liga chempionligiga mezbonlik qilgan edi. O‘yin davomida bayramona kayfiyat hukm surib, mash’alalardan chiqqan yashil tutun stadionni qamrab olgandi. Fojia ortidan liga kubogining taqdimoti qoldirilgandi.
“MC Alger” “NC Magra”ga qarshi 0:0 hisobida durang o‘ynab, ketma-ket ikkinchi yil ligada g‘olib chiqdi.
Izoh (0)