Dunyodagi eng yirik sport tashkilotlaridan biri — Xalqaro Harbiy Sport Kengashi (CISM) kurash sport turini rasmiy ravishda o‘z taqvimiga kiritdi. Bu muhim qaror Shri-Lankaning Kolombo shahrida o‘tgan CISM Bosh Assambleyasida qabul qilindi. Bu haqda Sport vazirligi matbuot xizmati xabar berdi.
CISM 1948-yilda tashkil etilgan bo‘lib, bosh qarorgohi Belgiyada joylashgan. Tashkilot 140 dan ortiq davlat a’zoligida harbiylar o‘rtasida sport orqali tinchlik va do‘stlikni targ‘ib qiladi.
Kurashning CISM tomonidan tan olinishi — bu Xalqaro Kurash Assotsiatsiyasi (IKA), O‘zbekiston Sport vazirligi, Qurolli Kuchlar va Kurash Federatsiyasining hamkorlikdagi sa’y-harakatlari natijasidir. Assambleyada IKA texnika direktori janob Ravi Kapur taqdim etgan kurash bo‘yicha taqdimot katta qiziqish uyg‘otdi va natijada bu sport turi CISM rasmiy sport turlari ro‘yxatiga kiritildi, deyiladi manbada.
Kurash bo‘yicha CISM doirasidagi ilk rasmiy musobaqa — Kurash Challenge Cup — 2026-yil 5–6 sentyabr kunlari O‘zbekistonda bo‘lib o‘tadi. E’tiborga molik jihati — final kuni 6-sentyabr “Jahon Kurash kuni”ga to‘g‘ri keladi.
Izoh (0)