Saudiya Arabistonining Riyod shahrida o‘tkazilayotgan Esports World Cup Chess musobaqasida chorak final bahslari boshlandi. Guruh bosqichidagi qiyin o‘tgan bellashuvlardan so‘ng pley-off yo‘llanmasini qo‘lga kiritgan Nodirbek Abdusattorov chorak finalda musobaqani tark etdi.
U mazkur bosqichda fransiyalik Alireza Firuzjaga qarshi dona surdi va har ikki partiyada ham mag‘lubiyatga uchradi. Abdusattorov birinchi partiyada vaqt tugagani bois imkoniyatni boy berdi, ikkinchi o‘yinda esa qo‘pol xatoga yo‘l qo‘ygani uchun yutqazib qo‘ydi.
Shu tariqa, Alireza Firuzja yarim finalga yo‘l oldi. Nodirbek Abdusattorov esa musobaqadagi ishtirokini yakunladi. O‘zbekistonlik shaxmatchi bu turnirdagi natijasi evaziga 90 ming dollar pul mukofotini qo‘lga kiritdi.
Eslatib o‘tamiz, ushbu musobaqada boshqa bir o‘zbekistonlik shaxmatchi — Javohir Sindorov ham ishtirok etgan edi. U guruh bosqichida ikki bor mag‘lubiyatga uchrab, musobaqani erta tark etdi.
Esports World Cup musobaqasining sovrin jamg‘armasi 1,5 million dollarni tashkil qiladi. G‘olib 250 ming dollar, ikkinchi o‘rin egasi 180 ming dollar, uchinchi va to‘rtinchi o‘rin egalari esa 125 ming dollardan mukofot oladi. 5–8-o‘rin egalari 90 ming, 9–12-o‘rinlar 65 ming, 13–16-o‘rinlar esa 50 ming dollar miqdorida mukofot puli bilan taqdirlanadi.
Izoh (0)