Superliganing 20-turidan o‘rin olgan Jizzaxda bo‘lib o‘tgan “So‘g‘diyona” – “Dinamo” uchrashuvi yakunlangach, Samarqand klubi hakamlik bilan bog‘liq qarorlar yuzasidan rasmiy shikoyat arizasi kiritgan. 21-avgust, chorshanba jamoa aynan qaysi epizodlar bo‘yicha e’tirozi borligini aniqlab, Liga rahbariyatiga rasmiy xat yo‘lladi. Bu haqda O‘zPFL matbuot xizmati xabar berdi.
Klubning shikoyat kiritish jarayoni “Superliga va Proliga reglamenti”da belgilangan qoidalarga to‘liq muvofiq bo‘lgan. Ya’ni, uchrashuv tugagach, 30 daqiqa ichida qaydnomaga rasmiy shikoyat kiritgan. 24 soat ichida esa e’tiroz bildirilgan epizodlar tafsilotlari alohida xatda taqdim etilgan.
Quyida “Dinamo” klubining e’tirozi bildirilgan asosiy epizodlar keltiriladi:
- 3-daqiqa — Anvarjon Hojimirzayevning Ivanovich tomonidan jarima maydonchasi ichida to‘xtatilishi;
- 9-daqiqa — Sanjar Qodirqulovga hakam tomonidan ko‘rsatilgan ogohlantirish;
- 11-daqiqa — Hojimirzayevga nisbatan ishlatilgan qo‘pollikka bosh hakamning reaksiyasi;
- 31-daqiqa — Fransisko Ferreyra va Suhrob Izzatov o‘rtasidagi kurashga nisbatan hakam qarori;
- 75-daqiqa — “So‘g‘diyona” futbolchisi Nodirjon Soyibovning maydondan chetlatilmasligi;
- 90+6-daqiqa — “Dinamo” darvozasiga penalti belgilanishi.
Liga mutaxassislari ushbu vaziyatlarni o‘rganib chiqib, ayrim holatlarda ularda ham savollar paydo bo‘lganini ma’lum qildi. Endilikda, “Dinamo” klubining shikoyatiga asoslangan holda, O‘zbekiston Futbol Hakimlari Markazi (O‘zFHM) tomonidan rasmiy tushuntirish berilishi talab etiladi.
Liga hakamlarni o‘qitish, tayinlash, baholash yoki jazolash vakolatiga ega emas. Biroq, uchrashuvlarda hakamlar faoliyati bilan bog‘liq barcha xarajatlar Liga tomonidan qoplanadi. Aynan shu asosda, klublardan hakamlik yuzasidan shikoyatlar kelib tushgach, Liga O‘zFHM rahbariyatidan rasmiy izoh talab qiladi, deya qo‘shimcha qilinadi O‘zPFL bayonotida.
Ma’lumot uchun, 20-avgust, chorshanba kuni bo‘lib o‘tgan “So‘g‘diyona” — “Dinamo” uchrashuvida 1:1 hisobi qayd etilgan.
Izoh (0)