Ispaniyaning “Barselona” klubi Klublar o‘rtasidagi Jahon chempionatida ishtirok etish umidida FIFA’ga rasmiy murojaat bilan chiqdi. Kataloniyaliklar turnirdan chetlatilgan Meksikaning “Leon” klubi o‘rnini egallashni so‘ragan. Bu haqda Marca nashriga tayanib Championat xabar berdi.
Biroq, FIFA “Barselona” klubining iltimosini rad etdi. Sababi, reglamentga ko‘ra, har bir mamlakatdan faqat ikkita jamoa ishtirok etishi mumkin. Ispaniyadan esa “Real Madrid” va “Atletiko Madrid” turnirga yo‘l olgan. “Ko‘k-anorranglilar”ning YCHLdagi so‘nggi natijalari qimmatga tushdi, shu bois ular kerakli reyting ballarini qo‘lga kirita olmadi.
“Leon” klubining o‘rnini egallash uchun saralash uchrashuvi tashkil etildi va uning natijasiga ko‘ra AQShning “Los-Anjeles” klubi Jahon chempionatida ishtirok etish huquqini qo‘lga kiritdi.
Eslatib o‘tamiz, “Leon” turnirdan chetlatilgan edi. Bunga sabab — FIFA’ning “bir egalikda bir nechta klub” bo‘lishiga qarshi qoidasidir. Meksikaning “Pachuka” klubi Jahon chempionatida qatnashmoqda va u ham xuddi “Leon” singari “Grupo Pachuca” kompaniyasiga tegishli. Shu bois, FIFA manfaatlar to‘qnashuvining oldini olish maqsadida “Leon”ni turnirdan chetlatdi.
Izoh (0)