FIFA 2027-yilda o‘tkazilishi rejalashtirilgan U-20 Jahon chempionati mezbonligini aniqlash jarayoniga kirishdi. Shu bois O‘zbekiston va Ozarbayjon futbol federatsiyalari yoshlar o‘rtasidagi ushbu nufuzli musobaqani birgalikda o‘tkazish uchun FIFA’ga ariza yubordi. Bu haqda O‘zbekiston futbol assotsiatsiyasi xabar berdi.
Bugungi kunda O‘zbekiston va Ozarbayjon mezbonlikka har tomonlama tayyor ekani ta’kidlanmoqda. So‘nggi yillarda mamlakatdagi stadionlar xalqaro standartlarga muvofiq zamonaviy holatga keltirildi. Bundan tashqari, Osiyo U-20 va U-23 musobaqalari, shuningdek, Markaziy Osiyo tarixida ilk bor o‘tkazilgan futzal bo‘yicha Jahon chempionati mezbonligi O‘zbekiston uchun katta tajriba hisoblanadi. Ushbu tadbir FIFA prezidenti Janni Infantino tomonidan tarixdagi eng yaxshi mundiallardan biri sifatida e’tirof etilgan, deyiladi O‘FA xabarida.
Ma’lumot uchun, futbol bo‘yicha U-20 Jahon chempionati har ikki yilda o‘tkaziladi. 20 yoshgacha bo‘lgan futbolchilar o‘rtasidagi navbatdagi mundial 2025-yilning 27-sentyabrdan 19-oktyabrga qadar Chili maydonlarida o‘tkaziladi. Ushbu musobaqada Osiyo qit’asidan 4 ta jamoa — Avstraliya, Saudiya Arabistoni, Yaponiya va Janubiy Koreya ishtirok etadi.
Izoh (0)