Angliyaning “Manchester Siti” klubi “Milan” yarim himoyachisi Teyani Reyndersni qo‘lga kiritish uchun rasmiy taklif tayyorlamoqda. Bu haqda jurnalist Nikolo Skira xabar berdi.
Manbaga ko‘ra, “shaharliklar” futbolchi uchun 60–65 million yevro atrofida taklif qilishni reja qilgan. Shuningdek, ular Reyndersga 2030-yilgacha mo‘ljallangan shartnoma va yiliga 8 million yevro maosh to‘lashga tayyor. Biroq “Milan” rahbariyati niderlandiyalik yarim himoyachini kamida 80 million yevroga sotishni rejalashtirgan.
Unga ko‘ra, Pep Gvardiolaning shaxsan o‘zi “Siti” rahbariyatidan Teyani transferini so‘ragan. Chunki o‘tgan mavsum yomon natijalar fonida ingliz klubi barcha pozitsiyalarni kuchaytirib, yana sovrinli o‘rinlarni egallamoqchi.
CityXtra nashrining qo‘shimcha qilishicha, “Manchester Siti” yozda yana 4 ta futbolchi bilan shartnoma imzolamoqchi. Yakuniga yetgan mavsum jamoada jarohatlar bilan bog‘liq muammolar kuzatildi. Shu bois “shaharliklar” har bir pozitsiyaga bir nechta kuchli futbolchilar olib kelmoqchi.
Ma’lumot uchun, yakuniga yetgan mavsum Reynders “Milan”ning barcha musobaqalar doirasidagi 54 ta o‘yinida maydonga tushib, o‘z hisobiga 15 ta gol va 5 ta golli uzatma yozdirib qo‘ygan. Futbolchining klub bilan shartnomasi 2030-yilga qadar amal qiladi. Transfermarkt portali 26 yoshli yarim himoyachining qiymatini 50 million yevroga baholagan.
Izoh (0)