Yevropa Konferensiyalar Ligasi 2-saralash bosqichi doirasidagi “Bashakshehir” va “Cherno More” jamoalari o‘rtasidagi javob bahsi bo‘lib o‘tdi. Istanbuldagi “Fotih Terim” stadionida kechgan uchrashuvda mezbonlar raqib darvozasiga javobsiz to‘rt gol urib, yirik hisobda g‘alabaga erishdi.
Hisob 17-daqiqada Ivan Brnich tomonidan ochildi. 31-daqiqada Migel Krespo hisobni 2:0 ko‘rinishiga keltirdi. Oradan 5 daqiqa o‘tib, Nunu Da Koshta “Bashakshehir”ning uchinchi golini urdi.
Uchrashuv yakuniga yaqin, 80-daqiqada Kristofer Operi to‘rtinchi golni kiritib, o‘yinga yakuniy nuqtani qo‘ydi. Istanbul klubi birinchi bahsda ham 1:0 hisobida raqibdab ustun kelgandi. Shu tariqa, umumiy 5:0 hisobida g‘alaba qozongan “Bashakshehir” saralashning keyingi bosqichiga yo‘l oldi.
O‘zbekistonlik hujumchi Eldor Shomurodov o‘yinning 58-daqiqasida Nunu Da Koshta o‘rniga zaxiradan maydonga tushdi. Abbosbek Fayzullayev esa uchrashuv qaydnomasiga kiritilmadi.
“Bashakshehir” saralashning 3-bosqichida Norvegiyaning “Viking” klubiga qarshi maydonga tushadi. Ilk bahs 7-avgust kuni bo‘lib o‘tsa, javob uchrashuvi 13-avgustga belgilangan.
Yevropa Konferensiyalar Ligasi
Javob uchrashuvi
31-iyul, payshanba
“Bashakshehir” — “Cherno More” 4:0 (birinchi o‘yin— 1:0)
Gollar: 1:0 — Brnich (17), 2:0 —Krespo (31), 3:0 — Koshta (36), 4:0 — Operi (80)
Izoh (0)