“Manchester Siti” yarim himoyachisi Bernardu Silva keyingi mavsum yakunida “shaharliklar” safini tark etishi mumkin. Bu haqda Football Insider nashri xabar berdi. Ma’lumotlarga ko‘ra, portugaliyalik futbolchining agenti Jorje Mendesh mijoziga yangi klub izlayapti.
Sabab shundaki, klub rahbariyati hozirgacha Silvaga shartnomani uzaytirish bo‘yicha hech qanday taklif bermagan. Uning amaldagi kelishuvi 2026-yil yozida tugaydi. Agenti futbolchining erkin agent sifatida boshqa jamoaga o‘tishini ta’minlash niyatida.
Avvalroq portugaliyalik yarim himoyachiga Saudiya Arabistonining “Al-Hilol” klubi qiziqish bildirayotgani haqida xabarlar tarqalgandi, biroq Silva 2025/26-yilgi mavsum ham “Manchester Siti”da o‘ynashni istayotganini ma’lum qilib, ingliz klubida qoldi.
Ma’lumot uchun, 30 yoshli futbolchi o‘tgan mavsum “Siti” safida 52 o‘yinda maydonga tushib, 6 ta gol va 5 ta golli uzatma muallifiga aylangan. Transfermarkt portali uning qiymatini 38 million yevroga baholamoqda.
Izoh (0)