Londonning “Chelsi” klubi joriy yozgi transfer oynasi vaqtida tarkibda “tozalash ishlari”ni amalga oshirishi kutilmoqda. Jurnalist Nikolo Skiraning xabariga ko‘ra, bu qaror klub bosh murabbiyi Enso Mareskaning tashabbusi bilan qabul qilingan. U “aristokratlar” rahbariyatiga 15 nafar futbolchining ro‘yxatini bergan.
Mareskaning “qora ro‘yxati”ga quyidagi futbolchilar kiritilgan: Kristofer Nkunku, Aksel Disasi, Benua Badyashile, Lesli Ugochukvu, Ben Chiluel, Rahim Sterling, Alfi Gilkrist, Karni Chukvuemeka, Kirnan Dyusberi-Holl, Nikolas Jekson, Mark Giu, Renatu Veyga, Aaron Anselmino, Armando Broya va David Datro Fofana. Klub bu futbolchilar bo‘yicha tushadigan takliflarni ko‘rib chiqishga tayyor. Ular to‘liq transfer yoki ijara asosida jamoadan ketishi mumkin.
Murabbiy bu qaror orqali bir necha maqsadni ko‘zlamoqda: tarkibni optimallashtirish, moliyaviy feyr-pley qoidalariga qat’iy amal qilish va o‘z futbol falsafasiga mos o‘yinchilar ishlash.
Ma’lumot uchun, “Chelsi” yangi mavsumdagi ilk uchrashuvini 17-avgust kuni o‘z maydonida “Kristal Pelas”ga qarshi o‘tkazadi.
Eslatib o‘tamiz, “aristokratlar” o‘tgan mavsumda Angliya Premer Ligasida 4-o‘rinni egallab, 2025/26-yilgi Yevropa Chempionlar Ligasi yo‘llanmasini qo‘lga kiritgan. Bundan tashqari, klub yangi formatda o‘tkazilgan Klublar o‘rtasidagi Jahon chempionatida g‘oliblikni qo‘lga kiritdi.
Izoh (0)