Portugaliyaning “Benfika” klubi markaziy himoyachisi Antonio Silva Yevropaning yetakchi klublari diqqat markazida qolmoqda. Transfer News Live nashrining xabar berishicha, 21 yoshli futbolchini Ispaniyaning ikki kuchli klubi — “Real Madrid” va “Atletiko Madrid” o‘z safida ko‘rishni istamoqda.
Avvalroq Silvaga Yevropaning boshqa jamoalari tomonidan qiziqish bildirilayotgani haqida xabarlar tarqalgandi. Biroq so‘nggi oylarda bu boradagi mish-mishlar kamayib qolgandi. Endilikda esa Madridning ikki grandi futbolchini qo‘lga kiritish niyatida ekani haqida yangiliklar paydo bo‘ldi.
Eslatib o‘tamiz, “Real Madrid” qishki transfer oynasi chog‘ida Silvani sotib olishga uringan, ammo moliyaviy cheklovlar sababli bu transfer amalga oshmagan. “Qirollik klubi” yozgi transfer oynasi vaqtida portugaliyalik himoyachini yana bir bor o‘z safiga qo‘shib olishga harakat qilmoqchi.
Ma’lumot uchun, Antonio Silva o‘tgan mavsumda “Benfika” safida jami 46 uchrashuvda maydonga tushib, 2 ta gol va 3 ta golli uzatmaga mualliflik qilgan. Transfermarkt portali unga 32 million yevro qiymat belgilagan. Silvaning “Benfika” bilan tuzgan shartnomasi 2027-yil yozigacha amal qiladi.
Izoh (0)