Xorvatiyalik markaziy himoyachi Yoshko Gvardiol 2024/25-yilgi mavsum yakunlariga ko‘ra “Manchester Siti”ning eng yaxshi futbolchisi deb e’tirof etildi. Bu haqda klub matbuot xizmati xabar berdi.
23 yoshli futbolchi o‘tgan mavsum barcha musobaqalar doirasida 53 ta o‘yinda maydonga tushib, 6 ta gol urib, 2 ta golli uzatma amalga oshirdi. Uning klub bilan shartnomasi 2028-yilgacha amal qiladi.
Angliya Premyer Ligasining yakunlangan mavsumida Xosep Gvardiola boshchiligidagi “Manchester Siti” 38 turda 71 ochko jamg‘arib, turnir jadvalida uchinchi o‘rinni egalladi va keyingi mavsum uchun UEFA Chempionlar Ligasi yo‘llanmasini qo‘lga kiritdi.
Ma’lumot uchun, 15-iyun kuni AQShda start oladigan Klublar o‘rtasidagi Jahon chempionatida “Manchester Siti” G guruhida ishtirok etadi. Ingliz klubi mazkur turnirda Birlashgan Arab Amirliklarining “Al-Ayn”, Marokashning “Vidad” hamda Italiyaning “Yuventus” jamoalariga qarshi maydonga tushadi.
Ushbu musobaqa “shaharliklar” uchun yangi mavsum oldidan muhim sinov vazifasini o‘taydi.
Izoh (0)