Hindiston futbol assotsiatsiyasi (HFA) “Barselona” sobiq bosh murabbiyi Xavi Ernandesni milliy terma jamoa bosh murabbiyi sifatida tayinlash taklifini rad etdi. Bu haqda The Khel India nashri xabar berdi.
Ma’lum qilinishicha, hozirda Hindiston terma jamoasi uchun yangi murabbiy qidirilayotgan bir paytda Xavi o‘z xizmatlarini ushbu mamlakat assotsiatsiyasiga taklif qilgan. Biroq ular 45 yoshli ispaniyalik mutaxassisning maosh borasidagi yuqori talablarini inobatga olib, uni nomzodlar ro‘yxatiga kiritmaslikka qaror qilgan.
Eslatib o‘tamiz, Xavi 2024-yil yozidan buyon hech qayerda faoliyat yuritmayapti. Oldinroq u Saudiya Arabistonining “Al-Ahli” klubini boshqarishi mumkinligi haqida xabarlar tarqalgan edi, ammo bu mish-mishlar o‘z tasdig‘ini topmadi.
Ma’lumot uchun, Xavi 2021-yildan 2024-yilgacha “Barselona” bosh murabbiyi sifatida faoliyat olib borgan. Shuningdek, u Qatarning “As-Sadd” klubida ham ikki yil mobaynida ishlagan edi.
Izoh (0)