O‘zbekiston Superligasining ikkinchi davrasi boshlandi. 1-avgust, juma kuni 16-tur bahslari doirasidagi dastlabki ikki o‘yin bo‘lib o‘tdi: “Buxoro” — “OKMK” va “Mash’al” — “Paxtakor”.
“Buxoro” jamoasining uy stadionida rekonstruksiya ishlari olib borilayotgani sababli, jamoa o‘z o‘yinlarini Qarshidagi “Markaziy” stadionda o‘tkazmoqda. “OKMK”ga qarshi o‘yin ham aynan shu arenada bo‘lib o‘tdi.
Uchrashuv juda qiziqarli boshlandi. Har ikki jamoa birinchi bo‘limda navbatma-navbat xavfli hujumlar uyushtirdi. Taym so‘ngida mehmonlar hisobni ochdi. Ruben Sanchesning chiroyli uzatmasini Naoaki Sena gol bilan yakunladi.
Ikkinchi bo‘lim boshlarida “OKMK” ikkinchi marta raqib darvozasini ishg‘ol qildi. Bu safar gol muallifi bevosita Sanchesning o‘zi bo‘ldi. Yakuniy hisob — 0:2. Shunday qilib, Mirjalol Qosimov boshchiligidagi “OKMK” ikkinchi davrani g‘alaba bilan boshladi.
Ushbu uch ochko evaziga olmaliqliklar turnir jadvalida 30 ochko bilan 3-o‘ringa ko‘tarildi. “Buxoro” esa 13 ochko bilan 14-pog‘onada qolmoqda.
Turning ikkinchi uchrashuvi Muborakda bo‘lib o‘tdi. Unda mezbon “Mash’al” Toshkentning “Paxtakor” klubini qabul qildi. Bellashuvda poytaxtliklar minimal 1:0 hisobida g‘alab qozondi. O‘yindagi yagona gol 75-daqiqada Dostonbek Hamdamov tomonidan kiritildi.
Mazkur g‘alaba orqali “Sherlar” ochkolarini 29 taga yetkazib, turnir jadvalida 4-o‘ringa ko‘tarildi. “Mash’al” esa 15 ochko bilan 12-pog‘onani egallab turibdi.
O‘zbekiston Superligasi
16-tur
1-avgust, juma
“Buxoro” — “OKMK” 0:2
Gollar: 0:1 — Senaga (40), 0:2 — Sanches (53)
“Mash’al” — “Paxtakor” 0:1
Gollar: 0:1 — Hamdamov (75)
Izoh (0)