Kataloniyaning “Barselona” klubi futbolchisi Rafinya 2025-yilgi “Oltin to‘p” uchun kurashda jamoadoshi Lamin Yamalning imkoniyatlari haqida fikr bildirdi. Uning ta’kidlashicha, individual mukofotlardan ko‘ra insoniy qadriyatlar ustuvor ahamiyatga ega.
Braziliyalik futbolchi “Oltin to‘p” “Barselona” futbolchisiga berilishi kerakmi, degan savolga quyidagicha javob berdi:
Menimcha, bu mukofot adolatli tarzda topshirilishi kerak. Mening qanday fikrda ekanligim ko‘p narsani anglatmaydi. “Oltin to‘p”ni har qaysi futbolchi qo‘lga kirita olmaydi. Shaxsan men uchun esa eng muhimi — o‘z uyimda, oilam, farzandlarim va menga yaqin insonlar nazarida dunyodagi eng yaxshi odam bo‘lish.
Shuningdek, u jamoadoshi Lamin Yamal haqida ham iliq fikrlar bildirdi:
Yamal — ajoyib futbolchi. U uzoq yillar davomida dunyoning eng yaxshi futbolchisiga aylanishi mumkin. Bu faqat o‘ziga bog‘liq. Chunki unda iste’dod bor. Hozir esa juda ko‘p mehnat qilishi kerak, — dedi Rafinya Sport nashriga bergan intervyusida.
Eslatib o‘tamiz, “Barselona” o‘tgan mavsum Ispaniya chempionligi, Ispaniya Kubogi va Superkubogini qo‘lga kiritgan.
Izoh (0)