“Real Madrid”dagi faoliyatini yakunlayotgan xorvatiyalik futbolchi Luka Modrich “Milan” qiziqishlari doirasiga tushib qoldi. Jurnalist Fabrisio Romanoning xabariga ko‘ra, “rossonerilar” yozda u bilan shartnoma imzolash haqida o‘ylamoqda.
Milanliklarning yangi sport direktori Igli Tare Modrichni jamoaning markaziy chizig‘ini kuchaytirish uchun ideal variant sifatida ko‘rmoqda. 39 yoshli yarim himoyachi “Real” safidagi so‘nggi turniri sifatida Klublar o‘rtasidagi Jahon chempionatida ishtirok etadi, shundan so‘ng yangi jamoaga o‘tishi kutilmoqda.
Modrichga hozirda Saudiya Arabistoni, AQSH (MLS) va bir nechta Yevropa klublari qiziqish bildirmoqda. Biroq Massimiliano Allegri boshchiligidagi “Milan” unga yaxshi loyiha va oilaviy hayot uchun qulay sharoit taklif qilmoqda. Bu esa qaror qabul qilishda muhim omil bo‘lishi mumkin.
Hozircha muzokaralar dastlabki bosqichda, ammo Modrich nomi “Milan” kiyinish xonasida faol tarzda muhokama qilinmoqda. Klub bu transfer orqali tarkibni kuchaytirish bilan birga, o‘zining yangi ambitsiyalarini ham namoyish qilmoqchi. Oxirgi qaror Modrichning o‘ziga bog‘liq.
Modrich 2012-yildan beri “Real Madrid” safida o‘ynab keladi. U “qirollik klubi” bilan 28 ta sovrin qo‘lga kiritdi, jumladan, 6 marta UEFA Chempionlar Ligasida g‘olib bo‘lgan. Modrich “Real” tarkibida 590 o‘yinda maydonga tushib, 43 ta gol va 95 ta golli uzatma yozdirib qo‘ygan.
Izoh (0)