Ispaniyaning “Barselona” klubi Angliya terma jamoasi hujumchisi Markus Reshfordni ijaraga olish borasida “Manchester Yunayted” bilan kelishuvga erishdi. Bu haqda taniqli insayder Nikolo Skira ijtimoiy tarmoqdagi sahifasi orqali xabar berdi.
Manbaga ko‘ra, “ko‘k-anorranglilar” Reshfordning bir yillik ijarasi uchun 10 million yevro to‘laydi. Shuningdek, shartnoma futbolchini to‘liq xarid qilish bandini ham o‘z ichiga oladi: kataloniyaliklar 27 yoshli futbolchini 30 million yevroga sotib olish huquqiga ega bo‘lib, qo‘shimcha ravishda turli shartlar bajarilsa, yana 5 million yevro bonus to‘lanishi mumkin.
Reshfordning o‘zi bilan tuziladigan shartnoma 2029-yil yozigacha mo‘ljallangan bo‘lib, unga har yili 12 million yevro miqdorida maosh belgilangan.
Ma’lumot uchun, Markus Reshford — “Manchester Yunayted” klubi tarbiyalanuvchisi hisoblanadi. U o‘tgan mavsumning ikkinchi yarmida ijara asosida “Aston Villa” safida to‘p surgan edi. Uning “Yunayted” bilan shartnomasi 2028-yil yozigacha amal qiladi. Transfermarkt portali futbolchining qiymatini 50 million yevroga baholamoqda.
Izoh (0)