O‘zbekiston terma jamoasi hujumchisi Eldor Shomurodov “Bashakshehir” jamoasi bilan shartnoma imzoladi. Istanbul jamoasi o‘zbekistonlik futbolchini mavsum oxiriga qadar ijaraga olgan va kelishuvda uni majburiy sotib olish bandi ham mavjud. Ushbu transfer rasman e’lon qilingach, hujumchi “Roma” muxlislariga xayrlashuv maktubi yo‘lladi.
Futbolchi o‘zining Instagram sahifasida jamoaga minnatdorlik bildirdi:
Men uchun unutilmas xotiralarni taqdim etgan klub bilan xayrlashish vaqti keldi. “Roma” libosini kiyish men uchun sharaf. Ushbu jamoa safida kiritgan gollarim, jamoadoshlarim, murabbiylar hamda muxlislar bilan o‘tkazgan lahzalarni bir umr eslab qolaman, — deya yozdi Shomurodov.
U klubda o‘tgan har bir daqiqani qadrlashini, gol nishonlagan lahzalar va murabbiylardan olgan saboqlar uchun minnatdor ekanini ta’kidladi:
“Roma” har doim yuragimda qoladi — menga ishongani va har bir vaziyatda qo‘llab-quvvatlagani uchun klubga minnatdorchilik bildiraman. Mening hayotimda yangi sahifa ochilmoqda, biroq bu xotiralar meni hech qachon tark etmaydi, — deya qo‘shimcha qildi futbolchi.
Ma’lumot uchun, Shomurodov 2021-yilning yozida “Jenoa”dan “Roma”ga o‘tgan edi. U rimliklar safida jami 85 ta o‘yinda maydonga tushib, 13 ta gol va 11 assist muallifiga aylangan. Transfermarkt portali hujumchining qiymatini 5 million yevroga baholamoqda.
Izoh (0)