“Manchester Yunayted” “Kristal Pelas”ning 21 yoshli yarim himoyachisi Adam Uortonga jiddiy qiziqish bildirmoqda. TEAMtalk nashrining xabar berishicha, “qizil iblislar” yozgi transfer oynasi yopilguniga qadar jamoaning o‘rta chizig‘ini kuchaytirishni rejalashtirgan.
Manbaga ko‘ra, Uorton “Manchester Yunayted” safiga o‘tishga rozilik bildirgan. Biroq “Kristal Pelas” futbolchini sotishga shoshilmayapti. Klub rahbariyati uni saqlab qolmoqchi, chunki Mark Gehi “Liverpul”ga, Eberechi Eze esa “Arsenal”ga o‘tishi mumkinligi aytilmoqda. Shunday bois, ular yana bir asosiy yarim himoyachidan biri bilan xayrlashishni xohlamayapti.
Agar “Pelas” futbolchini sotishga qaror qilsa, transfer narxi kamida 60 million funt sterling (taxminan 69,6 million yevro) atrofida bo‘lishi kutilmoqda.
Shunga qaramay, mankunianliklar Uorton transferidan voz kechmagan va uning atrofidagi vaziyatni diqqat bilan kuzatishda davom etmoqda. Sababi “Manchester Yunayted” rahbariyati Adamni Kazemiroga munosib o‘rinbosar sifatida ko‘rmoqda.
- Uorton o‘tgan mavsum barcha musobaqalar doirasida 27 ta uchrashuvda maydonga tushib, ikki golli uzatma amalga oshirgan.
- Uning “Kristal Pelas” bilan tuzgan amaldagi shartnomasi 2029-yil yozigacha mo‘ljallangan.
- Transfermarkt portali yarim himoyachinin qiymatini 45 million yevroga baholagan.
Izoh (0)