Madridning “Real” klubi hujumchisi Kilian Mbappe yangi mavsumdan boshlab jamoada 10-raqam ostida o‘ynashini ijtimoiy tarmoqlardagi sahifasi orqali rasman tasdiqladi.
Fransiyalik futbolchi o‘zining X (sobiq Twitter) tarmog‘idagi sahifasida “10” raqami tasvirlangan postni joylab, Madrid klubi safida raqamni o‘zgartirishi haqidagi mish-mishlarga nuqta qo‘ydi. Eslatib o‘tamiz, o‘tgan mavsumda Mbappe “Real”da 9-raqam bilan maydonga tushgan edi.
10
— Kylian Mbappé (@KMbappe) July 23, 2025
Avvalroq bu raqam ostida klub afsonasi, xorvatiyalik yarim himoyachi Luka Modrich to‘p surgan. U yaqinda “Milan” klubiga ko‘chib o‘tdi va natijada 10-raqam bo‘sh qolgan edi.
Ma’lumot uchun, Kilian Mbappe “Real Madrid” safiga 2024-yil yozida qo‘shilgan. U klub bilan allaqachon UEFA Superkubogi va Interkontinental kubogini qo‘lga kiritgan. Hujumchi o‘tgan mavsum “qirollik klubi” tarkibida 59 ta o‘yin o‘tkazib, o‘z hisobiga 44 ta gol va 5 ta golli uzatma yozdirib qo‘ygan.
Izoh (0)