Londonning “Tottenhem” klubi hujumchisi Son Xyon Min yozgi transfer oynasida jamoani tark etishi mumkin. Jurnalist Mett Louning xabariga ko‘ra, klub ichkarisidagilar Son yaqin orada jamoani tark etishni rejalashtirgani haqida mish-mish tarqatgan.
Dailymail nashriga ko‘ra, futbolchiga Saudiya Arabistoni klublaridan jiddiy taklif bor. Agar barchasi muvaffaqiyatli yakunlansa, futbolchi karyerasini Osiyo qit’asida davom ettirishi mumkin.
Futbolchining o‘zi “Tottenhem”dan ketish haqidagi savolga quyidagicha javob berdi:
— Hali yana bir yillik shartnomam bor. Hozircha ketish yoki qolish borasida hech narsa deya olmayman. Lekin qayerda bo‘lmasin, doim qo‘limdan kelganicha harakat qilaman.
Son Xyon Min “Tottenhem” safida 2015 yildan beri to‘p surmoqda. O‘tgan mavsumda u barcha musobaqalar doirasidagi 46 ta o‘yinda maydonga tushib, o‘z hisobiga 11 ta gol va 12 ta golli uzatma yozdirib qo‘ygan. 32 yoshli janubiy koreyalik futbolchining hozirgi shartnomasi 2026-yil iyun oyigacha amal qiladi.
“Tottenhem” Angliya chempionatini 17-o‘rinda yakunlaganiga qaramay, Yevropa Ligasida g‘olib bo‘lib, Chempionlar Ligasi yo‘llanmasiga ega chiqdi.
Izoh (0)