Kataloniyaning “Barselona” klubi “Espanyol” darvozaboni Joan Garsiyaning vakillari bilan uchrashib, shartnoma bo‘yicha kelishuvga erishdi. Bu haqda Mundo Deportivo nashri xabar bermoqda.
Manbaga ko‘ra, 24 yoshli darvozabon bilan tuziladigan kelishuv 5 yilga mo‘ljallangan. Shuningdek, shartnomada agar Joan Ispaniya milliy terma jamoasiga chaqiruv olgan taqdirda bonus to‘lanishi haqida band ham kiritilgan. Hozirda yakuniy qaror Garsiyaning o‘ziga bog‘liq bo‘lib, u shartnomani tasdiqlashi kutilmoqda.
Hozirda unga bir nechta top-klublar ham qiziqish bildirilmoqda. Xususan, “Arsenal”, “Nyukasl Yunayted”, “Aston Villa”, “Napoli”, “Inter” va “Bayer” darvozabonni o‘z safiga qo‘shib olishdan manfaatdor. Futbolchi agentlari bilan uchrashib, keyin yakuniy qarorini qabul qilishini ma’lum qilgan.
Ma’lumotlarga ko‘ra, “Barselona” futbolchini qo‘lga kiritish uchun uning shartnomasida ko‘rsatilagan 25 million yevro miqdordagi tovon pulini to‘lashga tayyor.
Joan Garsiya joriy mavsumda “Espanyol” safida 38 ta o‘yinda maydonga tushib, 51 ta gol o‘tkazib yuborgan va 8 o‘yinda darvozasi daxlsizligini saqlab qolgan. Uning “Espanyol” bilan shartnomasi 2028-yilning yozigacha amal qiladi. Transfermarkt portali darvozabonning qiymatini 20 million yevroga baholagan.
Izoh (0)