Kataloniyaning “Barselona” klubi Myunxenning “Bavariya” jamoasida to‘p surayotgan ispaniyalik futbolchi Brayan Saragosani o‘z safiga qo‘shib olishni istamoqda. Bu haqda Ispaniyaning El Chiringuito nashri xabar berdi.
Manbaga ko‘ra, “Barselona” rahbariyati Saragosani La Ligada to‘liq raqobatlasha oladigan darajadagi futbolchi sifatida ko‘rmoqda. Shuningdek, uning transfer narxi ham klub rahbariyatini qanoatlantiradi.
23 yoshli futbolchining o‘zi ham Kataloniya klubining qiziqishidan xabardor. U ijtimoiy tarmoqlarda ushbu xabar e’lon qilingan postga “layk” bosgan, bu esa uning transferga ijobiy munosabat bildirganidan dalolat beradi. Ma’lumotlarga ko‘ra, “Barselona” yaqin kunlarda futbolchini sotib olish bo‘yicha rasmiy taklif yuborishni rejalashtirmoqda.
Avvalroq Saragosaning “Bavariya” bosh murabbiyi Vensan Kompanining yangi mavsum rejalariga kirmayotgani va yozgi transfer oynasida jamoani tark etishi mumkinligi haqida xabarlar tarqalgan edi.
Eslatib o‘tamiz, “Granada” akademiyasi tarbiyalanuvchisi bo‘lgan Brayan Saragosa o‘tgan mavsumni “Osasuna” safida ijarada o‘tkazgan. U 28 o‘yinda maydonga tushib, 1 gol va 6 golli uzatmaga mualliflik qilgan. Shuningdek, futbolchining Ispaniya terma jamoasi safida 1 ta gol kiritgani ham qayd etilgan.
Transfermarkt ma’lumotiga ko‘ra, Saragosaning “Bavariya” bilan amaldagi shartnomasi 2029-yil yoziga qadar mo‘ljallangan bo‘lib, uning transfer bahosi 12 million yevroga teng.
Izoh (0)