O‘zbekiston milliy terma jamoasi Toshkentda Jahon chempionlariga qarshi o‘ynaydi — manba

O‘zbekiston terma jamoasi noyabr oyida Urugvay terma jamoasiga qarshi o‘rtoqlik uchrashuvi o‘tkazadi. Bu haqda Championat.asia nashri xabar bermoqda.

Manbaga ko‘ra, Temur Kapadze jamoasi noyabrdagi FIFA kunlarida Urugvayga qarshi ikkita o‘rtoqlik uchrashuvi o‘tkazadi. 1930 va 1950-yillarda Jahon chempioni bo‘lgan Urugvayga qarshi bellashuvlardan biri Toshkentda bo‘lib o‘tishi rejalashtirilgan. Ikkinchi o‘yin esa Osiyo qit’asida o‘tkazilishi ko‘zda tutilmoqda.

Avvlaroq Urugvay Futbol Federatsiyasi prezidenti Ignasio Alonso 2025-yilning noyabr oyida Urugvay Rossiyaga qarshi o‘rtoqlik uchrashuvi o‘tkazilishi mumkinligini ma’lum qilgan edi:

Rossiyaga qarshi o‘yin noyabr oyida o‘tkazilishi mumkin. Ammo bu borada yakuniy qaror qabul qilganimiz yo‘q. Oldimizda ancha vaqt bor, tez orada o‘z qarorimizni e’lon qilamiz, — deydi Alonso.

Eslatib o‘tamiz, O‘zbekiston milliy jamoasi bungacha Urugvay bilan ikki bor o‘rtoqlik uchrashuvi o‘tkazgan va har ikkala o‘yinda ham 0:3 hisobida mag‘lub bo‘lgan. Birinchi uchrashuv 2018-yilda Montevideo shahrida, ikkinchisi esa 2019-yilda Xitoyda bo‘lib o‘tgan.